Aslanbek Shymbergenov pen Nurbek Oralbaı el qorjynyna taǵy eki joldama saldy
Onyń birin — erler arasynda Qazaqstan ulttyq quramasynyń kapıtany Asylanbek Shymbergenov jeńip alsa, ekinshisin — Nurbek Oralbaı qanjyǵasyna baılady.
Naqtyraq aıtsaq, Shymbergenov shırek fınalda 2021 jylǵy álem chempıonatynyń qola júldegeri Ázerbaıjan boksshysy Varhan Alıevpen judyryqtasyp, qarsylasyn 5:0 esebimen jeńip, lıtsenzııaǵa ıe boldy.
Osylaısha Shymbergenov birinshi ret Olımpıada oıyndarynda baq synamaq.
Al 80 keli salmaqta el namysyn qorǵaǵan Nurbek Oralbaı shırek fınalda Irlandııa boksshysy Kelın Kassıdıdi 3:2 esebimen tize búktirdi.
Osylaısha erler arasynda shırek fınalǵan shyqqan bes boksshymyzdyń beseýi de Parıj Olımpıadasynyń joldamasyn qanjyǵasyna baılady.
Olar — Sáken Bıbosynov (51 keli), Mahmud Sabyrhan (57 keli), Aslanbek Shymbergenov (71 keli), Nurbek Oralbaı (80 keli) jáne Aıbek Oralbaı (92 keli).
Jalpy Italııadaǵy lıtsenzııalyq týrnırge erler arasynda alty boksshy attanǵan bolatyn.
Onyń arasynan tek 63,5 kelidegi boksshymyz Muhammedsabyr Bazarbaıuly 1/16 fınalda Eýropa chempıony Radoslav Rosenovtan jeńilip qaldy.
Osylaısha bokstan erler quramasy asa aýyr salmaqtaǵy Qamshybek Qońqabaevty qosa eseptegende jalpy 6 joldamaǵa qol jetkizdi.
Qońqabaev Olımpıada joldamasyn byltyr Qytaıdyń Hanchjoý qalasynda ótken Azııa oıyndarynda jeńip alǵan bolatyn.
Al áıelder quramasynan atalǵan týrnırge bes boksshy qatysyp, bári Olımpıadadan tys qaldy.
Dál qazir Parıj Olımpıadasyna burymdy boksshylarymyzdan jalǵyz joldama bar.
Ony ótken jyly Hanchjoýdaǵy Azııa oıyndarynda (Qytaı) 57 kelide álem chempıonatynyń 3 dúrkin júldegeri, 27 jastaǵy Karına Ibragımova jeńip alǵan bolatyn.
Osylaısha qazaq boksshylary úshin Italııadaǵy lıtsenzııalyq týrnır aıaqtaldy.