Boksshy Vasılıı Jırov Almatyda Ulttyq ulan sarbazdarymen kezdesti

<p>ALMATY. KAZINFORM &ndash; Quqyqtyq tártip áskerinde sarbazdardyń qoǵam qaıratkerlerimen, ataqty sprotshylarmen kezdesýi dástúrge aınalǵan. Bul joly &laquo;Ońtústik&raquo; óńirlik qolbasshylyǵyndaǵy ulandyq jaýyngerler bokstan aty ańyzǵa aınalǵan, táýelsiz Qazaqstannyń alǵashqy olımpıada chempıondarynyń biri &mdash; Balqash jolbarysy Vasılıı Jırovpen júzdesti. Bul týraly QR Ulttyq ulany &laquo;Ońtústik&raquo; óńirlik qolbasshylyǵynyń baspasóz qyzmeti málim etti.</p>

1996 jylǵy Atlanta olımpıadasynyń chempıonymen kezdesý «Ońtústik» óńirlik qolbasshylyǵy tárbıe jáne áleýmettik-quqyqtyq jumystar basqarmasynyń uıymdastyrýymen júzege asty. 5571 áskerı bóliminde ótken sharaǵa 300-den asa sarbaz qatysty.

Foto: QR Ulttyq ulannyń baspasóz qyzmeti

Balqash jolbarysy bıik belesterdi baǵyndyrý jolynda talaı kedergiler men qıyndyqtarǵa tap bolǵanyn, tek eren eńbektiń arqasynda bárin eńsere bilgenin asyqpaı otyryp baıandap berdi. Bıik armandarǵa jetýdiń joldarymen bólisip, salaýatty ómir saltyn ustanýǵa da shaqyrdy. Sarbazdar tarapynan qoıylǵan saýaldar da jaýapsyz qalmady.

Foto: QR Ulttyq ulannyń baspasóz qyzmeti

— Kez-kelgen sport túri qatań tártipti talap etedi. Jigitter, senderge aıtarym tártipke qol jetkizip, tek bıik belesterdi baǵyndyrýlaryńdy tileımin, — dep sózin qorytyndylady Vasılıı Jırov.

Olımpıada chempıony ulandyq sarbazdarǵa óziniń qoltańbasy qoıylǵan bokserlik qolǵaby men fotosýretterin estelikke tartý etti.

— Jırovtyń áńgimesin zeıin qoıyp tyńdaǵan sarbazdar erekshe rýhtanyp, bul kezdesýden úlken áser alǵandaryna senimdimin. Vasılıı Jırov — halqymyzdyń maqtanyshy, óziniń eńbegimen jáne tabandylyǵymen álemniń sport arenasynda Qazaqstan týyn jelbiretken sportshy. Vel Barker kýbogynyń ıegerin shaqyrýdaǵy bizdiń maqsatymyz — sarbazdar arasynda salaýatty ómir saltyn nasıhattaý. Bolashaqta shyń basyna shyqqysy keletin sarbazdarǵa aǵa býyn ókilderiniń osyndaı aqyl-keńesi eshqashan artyq etpeıdi. Keregin túrtip alyp, qajetine jaratady. Sondyqtan biz bul ıgi dástúrdi jalǵastyra beremiz, — deıdi tárbıe jáne áleýmettik-quqyqtyq jumystar basqarmasynyń bastyǵy podpolkovnık Arman Seıtov.

Kezdesý sońynda qonaqqa qurmet kórsetilip, «Ońtústik» óńirlik qolbasshylyǵynyń qolbasshysy general-maıor Talapker Ámireevtiń atynan alǵys hat tabystaldy. Chempıon sarbazdarmen estelik fotoǵa tústi.