Boks, jekpe-jek jáne kórkem gımnastıka: Elordada birneshe sport ortalyǵy ashyldy

NUR-SULTAN. QazAqparat - Nur-Sultan qalasynda boks, kórkem gımnastıka ortalyǵy jáne jekpe-jek zaly ashyldy, dep habarlaıdy QazAqparat tilshisi.

Naýryz merekesi qarasańynda ashylǵan atalǵan sport keshenderinde bir ýaqytta 500-den astam sportshy jattyǵa alady jáne ortalyqtar zamanaýı quraldarmen jabdyqtalǵan.

«Barshańyzdy Ulystyń uly kúni – Naýryz merekesimen jáne búgingi sport ortalyqtarynyń ashylýymen shyn júrekten quttyqtaımyn! Qalamyzda sport ortalyqtarynyń kóptep ashylýy turǵyndarynyń sportpen aınalysýyna jaǵdaı jasap, balalar men jasóspirimderdiń, sondaı-aq qala quramasynyń halyqaralyq básekelerde joǵary deńgeıde óner kórsetýine septigin tıgizedi», - dedi Nur-Sultan qalasy ákiminiń orynbasary Baqtııar Máken.

Uıymdastyrýshylardyń aıtýynsha, elordanyń ulttyq quramasy men sport mektepteriniń tárbıelenýshileri atalǵan ortalyqtarda tegin jattyǵa alady.

Aıta ketsek, bas qalada sport mektepterine qabyldaý ár jyldyń qyrkúıek-qazan aılarynda júrgiziledi. Arnaıy irikteýden ótken balalar Nur-Sultan qalasy ákimdigine qarasty sport mektepterinde sportpen tegin shuǵyldanady.