Boks: Jasóspirimder arasyndaǵy Azııa chempıonatynyń jeńimpazdary anyqtaldy

NUR-SULTAN. QazAqparat - Iordanııa astanasy Amman qalasynda bokstan Azııa chempıonatynda jasóspirimder arasynda ótken jarys jeńimpazdary anyqtaldy, dep habarlaıdy QazAqparat tilshisi.

Qazaqstandyq sportshylar uldar men qyzdar arasynda 6 altyn, 7 kúmis, 9 qola medal aldy. Nátıjesinde jalpy komandalyq esepte úshinshi orynǵa turaqtady.

El quramasynan altyn medalǵa uldardan Aıdar Qadyrhan (52 keli), Tórehan Sabyrhan (57 keli), Ahmet Úsen (63 keli) jáne Sanjar-Álı Begalıev (66 keli) qyzdardan Arýjan Jańabaeva (66 keli) jáne Quralaı Eginbaıqyzy (80 keli) chempıondyq tuǵyrǵa kóterildi.

Ózbekstan boksshylary 11 altyn, 6 kúmis jáne 3 qola medal alyp, jalpy komandalyq esepte kósh bastady. Al ekinshi orynǵa turaqtaǵan Úndistan jastary 8 altyn, 7 kúmis jáne 10 qola medal aldy.

Aıta ketsek, búgin, 14 naýryzda qurlyqtyq dodada jastar arasynda fınaldyq jekpe-jekter ótkiziledi. El quramasynan barlyǵy 14 boksshy synǵa túsedi.