Boks: Qytaıda turatyn qandasymyz Tokıo Olımpıadasyna joldama jeńip aldy

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde Qytaıda turatyn qandasymyz Tokıo Olımpıadasyna joldama utyp aldy, dep habarlaıdy QazAqparat tilshisi.

75 keli salmaqta Qytaı Ulttyq quramasynyń sapynan Olımpıada joldamasyna talasqan Toqtarbek Tańathanuly Tokıo Olımpıadasynyń joldamasyn enshiledi.

Bul týraly búgin Amman qalasynda ótip jatqan bokstan Olımpıadaǵa irikteý týrnırinde belgili boldy. Qandasymyz Qytaıdyń Shyńjań óńirinde 1996 jyly dúnıege kelgen. Ol búgingi tańda 75 keli salmaqta Qytaıdyń eń myqty boksshylarynyń biri.

Esterińizge sala keteıik, 75 keli salmaqta osyǵan deıin qazaqstandyq boksshy Ábilhan Amanqul da Olımpıada oıyndaryna lıtsenzııa utyp alǵan bolatyn. Osylaısha, qos qazaq azamaty Tokıo Olımpıadasynda synǵa túsedi.

Aıta keteıik, endi sanaýly mınýttardan keıin asa aýyr salmaqta sharshy alańǵa Qamshybek Qońqabaev shyǵady.