Boks: Qytaı quramasyndaǵy qandasymyz álem chempıonatyn jeńispen bastady

ASTANA. QazAqparat - Bokstan Qytaı quramasy sapynda synǵa túsip júrgen qandasymyz Toqtarbek Tańatqanuly Tashkentte ótip jatqan álem chempıonatynda alǵashqy jekpe-jeginde jeńiske jetti, dep habarlaıdy QazAqparat tilshisi.

Tańatqanuly Qytaı ulttyq quramasy sapynda 80 keli salmaqta judyryqtasyp júr. Ol Tashkentte armenııalyq Hambardzým Akopıanmen sharshy alańǵa shyǵyp, tóreshilerdiń biraýyzdan sheshimimen jeńiske jetti. Osylaısha ol álem birinshiligin ary qaraı jalǵastyrýǵa múmkindik aldy.

Aıta keteıik, Toqtarbek Tańatqan Qytaıdyń Shyńjań óńirinde 1996 jyly dúnıege kelgen. Ol -búgingi tańda 80 keli salmaqta atalǵan eldiń eń myqty boksshylarynyń biri, Qytaı chempıony. QHR quramasy sapynda Tokıoda ótken 2020 jylǵy Olımpıada oıyndaryna qatysqan bolatyn.

Eske sala keteıik, budan buryn bokstan álem chempıonatynda Saǵyndyq Toǵambaıdyń qarsylasyn nokaýtpen utqanyn jazǵan bolatynbyz.

Sondaı-aq Sanatáli Tóltaev kelesi kezeńge joldama aldy. 60 kelige deıingi salmaqta óner kórsetken qazaqstandyq boksshy Talǵat Syrymbetov 1/16 fınalda ótken jylǵy Azııa chempıony, ıordanııalyq Mohamed Abý-Djadjehten utylyp qaldy.