Boks: Qamshybek Qońqabaev álem chempıonatyn medalsiz aıaqtady

TAShKENT. QazAqparat - Ózbekstan astanasy Tashkent qalasynda ótip jatqan álem chempıonatynyń shırek fınalynda Qamshybek Qońqabaev (92 keliden joǵary) jarys jolynan shyǵyp qaldy, dep habarlaıdy QazAqparat tilshisi.

Qamshybek - el quramasyndaǵy tájirıbeli boksshylardyń biri.

Onyń qarsylasy - ózbekstandyq Bahodır Djalolov. Olar budan buryn birneshe márte kezdesken edi. Basym bóliginde ózbekstandyq boksshy jeńiske jetken bolatyn.

2019 jyly álem chempıonatynda Qamshybek fınalda atalǵan qarsylasyna ese jiberip, kúmis júldeni qanaǵat tutqan edi. Al 2020 jylǵy Tokıo Olımpıadasynda Bahodır - altyn, Qamshybek qola medal aldy.

Boksshylar alǵashqy eki raýndta bir-birine qarsy shabýylǵa shyqty. Dese de, saqtyq jasaýdy da umytqan joq. Qolaıly sátte soqqy jumsap, upaı alýǵa kúsh saldy. Eki raýndta da tóreshiler ózbek boksshysyna oń kóz tanytty.

Úshinshi raýndta Qamshybek basymdyǵyn arttyra tústi. Qarsylasyna birneshe soqqy jasap úlgerdi. Alaıda, bul jeńiske jetýine paıdasyn tıgizgen joq. Nátıjesinde B.Djalolov jartylaı fınalǵa joldama aldy.

Eske salsaq, budan buryn keshki sessııada Dýlat Bekbaýov (67 keli), Mahmýd Sabyrhan, Sanjar Tashkenbaı bokstan álem chempıonatynyń jartylaı fınalyna ótti.

Al kúndizgi sessııada Serik Temirjanov (57 keli) kýbalyq Saıdel Orta Rodrıgeske ese jiberdi.

Aslanbek Shymbergenov (71 keli) pen Nurbek Oralbaı (80 keli) da jarysty jalǵastyrýǵa múmkindik aldy.

Aıta ketsek, boksshylar jartylaı fınal oıyndaryn 12 mamyrda ótkizse, fınal 13 jáne 14 mamyr kúnderine belgilengen.