Boks: Bek Nurmaǵambet Azııa chempıonatynda jeńiske jetti

NUR-SULTAN. QazAqparat - Taılandta ótken erler men áıelder arasyndaǵy bokstan Azııa chempıonaty máresine jetti. Onda 81 kelige deıingi salmaq dárejesinde jarysqa qatysqan Armııa ortalyq sport klýbynyń sportshysy, halyqaralyq dárejedegi sport sheberi Bek Nurmaǵambet chempıon atandy, dep habarlaıdy «QazAqparat» QR Qorǵanys mınıstrliginiń baspasóz qyzmetine silteme jasap.

Fınalda Bek Nurmaǵambet Fılıppın sportshysy Djon Nobel Marvınmen kezdesti. Jekpe-jek barysynda qazaqstandyq boksshy basymdyq tanytyp, jeńiske jetti.

Sondaı-aq, saıystan keıin Bek Nurmaǵambet bolashaq josparlarymen bólisti. Sportshy Azııa chempıonaty ol úshin debıýtti bolǵanyn jáne alda Álem chempıonatynda top jarýǵa nıetti ekenin jetkizdi.

Bıylǵy týrnırge álemniń 39 eliniń ókilderi qatysty. Jarysqa B. Nurmaǵambetten basqa A. Muzaparov (52 kg), kishi serjant Q. Eralıev (56 kg), A. Shymbergenov (69 kg) jáne R. Volosenko (60 kg) sııaqty Álem jáne Azııa chempıonattarynyń jeńimpazdary men júldegerleri qatysty.

Buǵan deıin habarlanǵandaı, bokstan Azııa chempıonatynda qazaqstandyqtar eki «altyn», eki «kúmis» jáne jeti «qola» enshiledi.