Boks bapkeri: Aýyldan shyqqan balalar shymyr ári shydamdy keledi

ÓSKEMEN. QazAqparat – Shyǵys Qazaqstan oblysynda bolashaq boks juldyzdaryn daıyndaý úshin bapkerler aıanbaı eńbek etýde. Óskemende Q.Muńaıtpasov atyndaǵy balalar men jasóspirimderdiń olımpıadalyq rezerv sport mektebinde boks úıirmesiniń ashylǵanyna birneshe jyl bolǵan. Sol jerde bapker bolyp jumys isteıtin Ádilet Shorǵanov jasóspirimderge kórgen-bilgenin úıretip, aqyl-keńesterin aıtyp júr. QazAqparat tilshisine suhbat bergen bapkerdiń aıtýynsha, bul sport túrinde jeńimpaz ataný úshin fızıkalyq turǵydan myqty bolyp qana qoımaı, psıhologııalyq jaǵynan da shymyr bolý qajet.

- Bapker bolyp jumys istep kele jatqanyńyzǵa qansha jyl boldy?

- Q.Muńaıtpasov atyndaǵy balalar men jasóspirimderdiń olımpıadalyq rezerv sport mektebiniń boks úıirmesinde bapker bolyp júrgenime 8 jylǵa jýyq ýaqyt boldy. Bapkerlikti jumys deýge kelmes. Ol adamnyń súıikti isi bolýy kerek. Myqty bapker óz isiniń fanaty bolsa ǵana jetistikke jetedi dep oılaımyn.

- Qazirgi ýaqytta ózińiz qansha balany daıyndap júrsiz?

- Úıirmege balalardy 10 jastan bastap qabyldaımyz. Jattyǵý kúnine eki ret saǵat 09.00-den 11.00-ge deıin jáne 17.00-den 20.00-ge deıin jalǵasady. Aptasyna 6 kún daıyndalyp, jeksenbide demalady. Búgingi tańda ózimniń qaramaǵymda 50-ge jýyq bala bar. Olarǵa kórgen-bilgenimdi úıretip, aqyl-keńesterimdi aıtyp júrmin.

- Olardyń arasynda túrli jarystarda júldeli oryn alǵandar bar ma?

- Qazaqstan birinshiliginde, oblystyq jarystarda jeńimpaz atanǵandar da, júldeli oryn ıelengender de az emes. Biraq qazirgi koronavırýs pandemııasyna baılanysty saıystar ótkizilmeı ketti. Bolashaǵynan zor úmit kútetin shákirtterim – Azamat Erenov, Aıbar Erjanov, Sanjar Qabat, Tımýr Erbol, Mansur Jumajan, Rasýl Saǵıdoldınov, Aıbol Ahmetov. Taǵy basqa da talantty jas boksshylar bar. Olardyń bárin tizip shyqpaı-aq qoıaıyn.

- Boks adamdy nege tárbıeleıdi?

- Boks osaldardyń sporty emes. Osy joldy tańdaǵan adam aıanbaı esh úzdiksiz jattyqsa ǵana odan nátıje shyǵady. Bokspen aınalysqan bala patrıot, namysshyl er jigit bolyp ósedi. Óz-ózin, jaqyndaryn qorǵaı alyp, densaýlyqqa zııandy zattardan aýlaq júredi. Bul sport túrinde jeńimpaz ataný úshin fızıkalyq turǵydan myqty bolyp qana qoımaı, psıhologııalyq jaǵynan da shymyr bolý qajet.

- Bapkerlerge memleket tarapynan qandaı qoldaý kórsetilse deısiz?

- Bapkerlerdi muǵalimderdiń sanatyna jatqyzyp, aılyǵymyzdy arttyrsa jaqsy bolar edi. Óıtkeni, shynyn aıtqanda alatyn jalaqymyz azdaý. Qazir bári qymbattap jatyr. Sol úshin keı kezderi jumystan soń otbasymyzdy asyraý úshin taksıst bolyp aqsha tabýǵa týra keledi. Ózim bapkerlikpen aınalysqandy jan tánimmen jaqsy kóretindikten, maǵan senim artqan balalardyń bolashaǵyna alańdaǵandyqtan osy jumystan ketkim kelmeıdi. Eger jalaqymyz artyp, jaǵdaıymyz jaqsarsa esh oılanbastan bar kúsh-jigerimdi kúni-túni bapkerlik jolǵa sarp etýge daıynmyn.

- Bolashaqta Olımpıada chempıondary kóptep shyǵý úshin ne isteý kerek dep oılaısyz?

- Elimizde boks salasyna az kóńil bólinip jatqan joq. Dese de osymen toqtap qalmaý qajet. Aýyldardaǵy sportty damytyp, boks úıirmeleri kóptep ashylsa nur ústine nur bolar edi. Baıqaýymsha, aýyldan shyqqan balalar shymyr ári shydamdy keledi. Árıne qaladan da saıdyń tasyndaı sportshylardyń shyǵyp jatatyndyǵy bar. Alaıda aýylda qara jumysqa tóselgen bala jattyǵýlardy da ońaı eńserip áketedi. Kez kelgen ataǵy jer jarǵan boksshy, Olımpıada chempıony bapkeriniń eren eńbegi bolmasa osyndaı jetistikke jetpes edi. Óıtkeni, bapkerler jas sportshynyń boıynan qabiletti baıqap, ony damytyp, birge jarystarǵa ertip aparyp, qınalsa qoltyqtap, súrinse súıemeldeýge tyrysady. Sol úshin jańa aıtqanymdaı, bapkerlerdiń jaǵdaıyna da nazar aýdarylsa eken degen tilegimiz bar.

- Áńgimeńizge kóp rahmet!