Boks: Ábilhan Amanqul qytaılyq qazaqty utyp, fınalǵa shyqty

NUR-SULTAN. QazAqparat –Iordanııanyń Amman qalasynda ótip jatqan bokstan Olımpıadaǵa irikteý týrnıriniń jartylaı fınalynda qos qazaq bir-birimen qolǵap túıistirdi, dep habarlaıdy QazAqparat tilshisi.

Atalǵan Olımpıadayq týrnırde 75 keli salmaqta otandasymyz Ábilhan Amanqul jartylaı fınalǵa shyqqan bolatyn. Týra osy salmaqta Qytaı eliniń namysyn qorǵap júrgen, sol elde turatyn qandasymyz Tańathan Toqtarbek te Olımpıada oıyndaryna lıtsenzııa utyp, jartylaı fınalǵa joldama alǵan edi.

Eki qazaq boksshysynyń arasyndaǵy aıqas birden tartysty bastaldy. Birinshi raýnd qorytyndysy boıynsha 5 tóreshiniń úsheýi Qytaıdaǵy qandasymyzdy jeńdi dep tapsa, ekeýi qazaqstandyq boksshyǵa daýys berdi. Al ekinshi raýndta jerlesimiz qarqynyn údetip, tarazy basyn ózine aýdardy. Tóreshilerdiń sheshimi boıynsha 3:2 upaımen alǵa shyqty. Sońǵy sheshýshi raýndta eki boksshy da aıanyp qalǵan joq, biri-birine alma-kezek soqqylaryn ótkizip jatty. Bir qaraǵanda teń dárejede ótken sııaqty kóringenimen tóreshilerdiń sheshimimen qazaqstandyq boksshy jeńimpaz atandy.

Osylaısha, Qytaıdyń namysyn qorǵap júrgen qandasymyz Olımpıadalyq irikteý týrnıriniń qola júldegeri atansa, Ábilhan Amanqul qazaq boksshylarynan úshinshi bolyp fınalǵa shyqty.

Esterińizge sala ketsek, osyǵan deıin erler arasynda 69 keli salmaqta Abylaıhan Júsipov pen 57 kelige deıingi salmaqta Serik Temirjanov qola medal jeńip alsa, 63 kelide el namysyn qorǵap jatqan otandasymyz Zakır Safıýllın men 91 keli salmaqtaǵy boksshymyz Vasılıı Levıt fınalǵa ótken bolatyn.