Bókeı ordasy jáne Jánibek aýdandaryna aparatyn jol qashan salynady
Mınıstrdiń aıtýynsha, Qaztalovtan atalmysh aýdan ortalyqtary Saıqyn men Jánibekke deıingi joldy kúrdeli jóndeý jumystaryn 2019 jyly mamyr aıynda bastaý josparlanyp otyr.
Memleket basshysynyń tapsyrmasyna sáıkes mınıstrlik jol qurylysyna qomaqty qarjy bólýge daıyn. Joba merzimi ári ketkende úsh jyldan aspaıdy. Bıylǵy jyldyń sońyna deıin jobalyq-smetalyq qujattar jasalyp, alty lottan turatyn tender jarııalanbaqshy.
Oblys ákimi Altaı Kólginov Elbasy BQO-ǵa jumys sapary kezinde Bókeı ordasy men Jánibek aýdanyna jol salýǵa tapsyrma bergenin, soǵan sáıkes qarjy qaralyp, merdigerler belgili bolǵannan keıin jumystyń keshiktirilmeı bastalatynyn jetkizdi.
Qazirgi tańda Qaztalov aýdanynyń ortalyǵy Qaztalovqa deıingi 35 shaqyrymdyq jol salynýda. Bul maqsatqa 300 mln teńge qaralyp, jumysty "Uniserv" JShS atqaryp jatyr.
Jeńis Qasymbek jumys sapary barysynda Oral halyqaralyq áýejaıyn jańǵyrtý, sondaı-aq «Nurly jol» baǵdarlamasy aıasynda qolǵa alynǵan respýblıkalyq mańyzy bar Oral-Tasqala-RF shekarasy jolyn kúrdeli jóndeý barysymen tanysty. Uzyndyǵy 100 shaqyrymdyq Oral-Tasqala jolyna Ulttyq qordan 23,2 mlrd teńgege jýyq qarjy qaralǵan bolatyn. Bul joldy "Uniserv" JShS jyl aıaǵyna deıin bitirýdi kózdep otyr.
Chapaev-Jalpaqtal-Qaztalov baǵytynda salynyp jatqan jol qurylysymen tanysqan mınıstr sala mamandarynyń qatysýymen óńirdegi avtokólik joldaryn damytý máseleleri jóninde keńes ótkizdi.
Aıta keteıik, Oral men Orynbor baǵytynda Reseı shekarasyna deıingi 144 shaqyrym joldy kúrdeli jóndeý de qolǵa alynbaqshy. Elbasy tapsyrmasyna sáıkes Úkimetten qarjy bólinedi. Bıyl joldyń jobalyq-smetalyq qujattary daıyndalyp, ekinshi sanatty tórt jolaqty jol qurylysy 2019 jyly bastalady.
Oral-Tasqala-RF shekarasy, Oral-Chapaev-Qaztalov-Jánibek, Oral-Orynbor joldarynyń halyqaralyq mańyzy da erekshe, bul Reseıdiń kórshiles oblystarymen barys-kelisti jaqsartyp, qatynasty nyǵaıtady.