Bógeti buzylǵan Qaratal aýylynda eki úı men birneshe aýlaǵa sý kirdi

AQTÓBE. QazAqparat – Aqtóbe oblysynda Oıyl aýdanynyń Qaratal aýylynda bóget buzylyp, úı men aýlalarǵa sý kirdi. Qazir aýyl turǵyndary evakýatsııalanyp, mektepke ornalastyryldy, dep habarlaıdy QazAqparat tilshisi.

Buǵan deıin Oıyl aýdany Qaratal aýylynyń halqy dabyl qaǵyp, sý kirgen sátti vıdeoǵa túsirip, taratty. Keıin Aqtóbe oblysy ákiminiń baspasóz qyzmeti oqıǵa ornyna óńir basshysy Eraly Toǵjanov pen oblystyq Tótenshe jaǵdaılar departamentiniń bastyǵy Marǵulan Amanbaev barǵanyn habarlady. Jergilikti atqarýshy organ ókilderi turǵyndardy birden evakýatsııalady. Olar Qaratal aýylyndaǵy mektepke ornalastyryldy.

Kóp keshikpeı, oblys ákiminiń baspasóz qyzmetinen qaýip seıilip, turǵyndar úılerine oralyp jatqanyn málim etti.

«Oıyl ózeni kóterilip, bógettiń bir bóligin buzyp ketti. Aýylǵa qaýip tóngen soń turǵyndar evakýatsııalandy. Qazirgi kezde bógetti qaıta bekitý jumysy jalǵasyp jatyr. Oblys ákiminiń ózi Qaratal aýylyna baryp, turǵyndarmen kezdesti. Sabyrǵa shaqyryp, barlyq qaýipsizdik sharasy qolǵa alynǵanyn aıtty. Tasqyn sý eki úıge ishinara kirgen. 12 aýlaǵa jaıyldy. Qazirgi kezde ózen sýynyń deńgeıi túsip jatyr. Turǵyndarǵa qaýip joq. Evakýatsııalanǵan adamdar úıine oralýda. Al múlki zardap shekkenderge kómek beriledi», - dedi oblys ákiminiń baspasóz qyzmetinen.

Aıtyp óteıik, buǵan deıin bul aýylda gaz qubyry tesilip, qaýipsizdik maqsatynda gaz berý toqtatylǵan bolatyn. Sonymen birge aýylǵa jol joq. Ákimdik azyq-túlik pen dári-dármek jetkilikti ekendigin aıtýda.