Bóget salýǵa kómektesip, jurtty tánti qylǵan ıt týraly ne bilemiz
Atyraý oblystyq jedel shtabtyń aqparatyna qaraǵanda, ıttiń ıesi Zámzagúl Jańabaeva Sarytoǵaı aýylynda turady. Mahambet aýdanynda 21 eldi meken bar. Al Sarytoǵaı – Jaıyq ózenine jaqyn ornalasqan 17 aýyldyń biri.
«Bul ıtti kúshik kezinen beri asyrap kelemin. Ony úsh jyl buryn alǵan edim. Bir-birimizge úırenip qaldyq. Pshón dep atadym. Sodan beri túrli tapsyrmany oryndaýǵa úırettim. Aıtqanymdy buljytpaı oryndaıdy», - deıdi Zámzagúl Jańabaeva.
Onyń aıtýynsha, qum salynǵan qapshyqty tasý ońaı emes. Topyraqtyń salmaǵy aýyr.
«Maǵan qapshyqtardy tasymaldaý qıyn ǵoı. Sol sebepten ıtti shaqyryp, ıyǵyna qum salynǵan eki qapshyqty ildim. Sol qapshyqtardy súırelep, jaǵaǵa jetkizip berdi», - deıdi Zámzagúl Jańabaeva.
Eske sala ketelik, budan buryn Atyraýdaǵy bóget qurylysyna ózge óńirlerden jetkizilgen tehnıkalar tartylǵanyn jazǵan bolatynbyz.
Keıin úsh myńǵa jýyq sarbaz Jaıyq jaǵalaýynda bóget salyp júrgenin habarlaǵan edik. Atyraý jurtshylyǵyn áýrege salǵan tasqyn sýǵa qarsy kúres jumystaryna jergilikti ıtterdiń biri de óz úlesin qosyp, jurtshylyqty tánti qylǵanyn jazǵan bolatynbyz.