Bógen sý qoımasyna tótenshe jaǵdaı qaýpi tónip turǵan joq — ákimdik

<p>TÚRKІSTAN. KAZINFORM &mdash; Áleýmettik jelide Bógen sý qoımasynyń jaǵalaýyna qaýip tónip turǵandyǵy jaıynda aqparat tarady. Jelidegi jazba avtorlarynyń aıtýynsha, qar men jel saldarynan sý qoımasyndaǵy jaǵdaı qıyndaı túsken.&nbsp;</p>

«Jaǵalaýdyń topyraǵy jaýǵan qardyń sýynan ezilip barady. Qas qylǵandaı jel de qoıma jaqtan turyp alyp, jaıpaq jaǵalaýdyń bereketin alyp bara jatqan kórinedi», - dep jazdy Almas Altaı esimdi qoǵam belsendisi.

Atalǵan máselege qatysty resmı aqparat taratqan Túrkistan oblysynyń ákimdigi «Bógen» sý qoımasynda qaýip joq ekendigin málimdedi.

«Ordabasy aýdanyndaǵy syıymdylyǵy 370 mln. m3 bolatyn „Bógen“ sý qoımasy 1967 jyly paıdalanýǵa berilgen. Sý qoımasy 67,8 myń gektar jerdi aǵyn sýmen qamtamasyz etedi. Sý qoımanyń negizgi sý kózderi — „Arys“ magıstraldy kanaly jáne Bógen ózeni. Sý qoımasynan egistik jerlerge aǵyn sý Túrkistan magıstraldy kanaly jáne Bógen qashyrtqysy arqyly bosatylady. Qazirgi tańda sý qoımada 317 mln. m3 sý bar. Kirgen sý — 54,6 m3/sek, shyqqan sý — 25 m3/sek. Sý qoımada tótenshe jaǵdaı qaýpi tónip turǵan joq. Jaǵdaıdy baqylaý maqsatynda 2024 jyldyń 17 aqpanynda „Aral-Syrdarııa“ basseındik ınspektsııasy, „Turan sý“ ShJQ MKK jáne aýdandyq tótenshe jaǵdaı mamandarymen zerdeleý jumystary júrgizilip, akt túzildi. Sý qoımada jaǵdaı turaqty» — delingen aqparatta.

Sondaı-aq, ákimdik sý qoımaǵa kúrdeli jóndeý jumystaryn júrgizýge jobalyq-smetalyq qujattamalary ázirlenip jatqandyǵyn jetkizdi. Atalǵan jobaǵa memlekettik saraptama qorytyndysy da bıylǵy maýsym aıynda beriledi dep kútilýde.

«2021-2022 jyldary sý qoımada tótenshe jaǵdaılardyń aldyn alý maqsatynda kópfaktorly zerdeleý jumystary júrgizilgen. Budan bólek, sý qoımanyń beriktigin arttyrý maqsatynda 2022 jyly aǵymdaǵy jóndeý jumystarynan ótti. Qazirgi tańda sý qoıma apattyq jaǵdaılardyń aldyn alý boıynsha tıisti quraldarmen qamtamasyz etilgen» — delingen aqparatta.