Boeing úshin mańyzdy sheshim qabyldaıtyn kún: ereýil toqtaı ma

<p>ASTANA. KAZINFORM &ndash; Sársenbi amerıkalyq alpaýyt Boeing úshin mańyzdy kúnderdiń biri bolmaq. Shamalanyp otyrǵandaı, Astana ýaqytymen keshke kompanııa úshinshi toqsandaǵy iri shyǵyn týraly jarııalap, bir aıdan beri kásiporyn óndirisin tyǵyryqqa tiregen mehanıkter ereýili toqtaı ma belgili bolmaq, dep habarlaıdy Kazinform <a href="https://www.inform.kz/ru/klyuchevoy-den-dlya-boeing-krupnie-ubitki-i-reshenie-po-zabastovke-45de06" target="_blank" rel="noopener">tilshisi</a>.</p>

Tamyz aıynda taǵaıyndalǵan Boeing-tiń jańa bas dırektory Kellı Ortberg úshin ereýil úlken syn boldy. Ol qazirdiń ózinde jumys oryndaryn jappaı qysqartý týraly jarııalap, bankrottyqqa ushyramaý josparyn qurdy. 

Endi oǵan retteýshi organdardy kompanııanyń qaýipsizdik mádenıetin arttyryp jatqanyna jáne orta qashyqtyqqa ushatyn 737 Max tar fıýzelıajdi ushaǵyn shyǵarýdy ulǵaıtýǵa daıyn ekenine sendirýi kerek.  Bul – ushaq óndirýshiniń qarjylyq jaǵdaıyn qalpyna keltiretin mańyzdy qadamy bolmaq, dep jazdy Associated Press.

Degenmen de, kompanııa qyrkúıektiń ortasynan beri Sıetl aımaǵyndaǵy qurastyrý zaýyttarynyń jumysyn toqtatqan 33 myń mehanıktiń ereýili aıaqtamaıynsha, jańa ushaqtar shyǵara almaıdy. 

Sarapshylardyń shamalaýynsha, Boeing sársenbide úshinshi toqsanda shamamen 6 mlrd dollar shyǵynǵa (onyń ishinde áýe laınerlerine baılanysty 3 mlrd dollar shyǵyn) jáne qorǵanys pen ǵarysh baǵdarlamalary boıynsha 2 mlrd dollar shyǵynǵa ushyraǵanyn habarlaıdy. 

Kúnniń basty jańalyǵy sársenbiden beısenbige qaraǵan túni, Mashına jasaýshylar men aeroǵarysh salasy jumysshylarynyń halyqaralyq qaýymdastyǵy ereýilshilerdiń jumys oryndaryna oralýǵa daıyn ba degen suraqqa habar bere alatyn kezde shyǵady. 

Mehanıkter Boeing-tiń tórt jyl ishinde jalaqyny 35%-ǵa arttyrýdy, 7 myń dollar kólemindegi bonýstar jáne ónimdilik syıaqylaryn qamtıtyn usynysyna daýys beredi.