Boeing basshysy ushaq oqıǵalaryna baılanysty otstavkaǵa ketedi

<p>ASTANA. KAZINFORM &mdash;Boeing kompanııasynyń bas dırektory Deıv Kelhýn kompanııanyń áýe kemelerindegi birqatar tehnıkalyq aqaýlar men apattarǵa baılanysty menedjmentti qaıta uıymdastyrý aıasynda jyl sońyna deıin qyzmetinen ketedi, dep habarlady <a href="https://www.reuters.com/business/aerospace-defense/boeing-ceo-calhoun-step-down-2024-03-25/" target="_blank" rel="noopener">Reuters </a>agenttigi.</p>

Basqarma tóraǵasy Larrı Kellner men Boeing Commercial Airplanes kompanııasynyń bas atqarýshy dırektory Sten Dıl de aýysady, óıtkeni Boeing Dırektorlar keńesi ushaq óndirýshisine degen senimge nuqsan keltiretin jáne óndiristi ulǵaıtý múmkindigin qıyndatatyn kóptegen máselelerdi baqylaýǵa almaqshy.

Esterińizge sala keteıik, qańtar aıynda Boeing 737 MAX 9 ushaǵy korpýsynyń bir bóligi men ıllıýmınatory ushyp ketkennen keıin májbúrli túrde qondy.

Áýe kompanııasynyń basshylary oqıǵadan keıin birden Kelhýnǵa qoldaý bildirdi, biraq bul qoldaý óndiristiń qosymsha keshigýlerinen keıin azaıdy jáne retteýshiler negizgi óndiris ortalyǵyndaǵy sapa máselelerine nazar aýdara bastady.

Kelhýn 2018 jáne 2019 jyldary 350-ge jýyq adamnyń ómirin qıǵan apattardan keıin bas dırektor bolyp taǵaıyndaldy.

Ol otstavkaǵa ketý týraly sheshimdi ózi qabyldaǵanyn aıtty.

«Men jyl sońyna deıin zeınetke shyǵý josparymdy habarlaýǵa sheshim qabyldadym», - dedi Kelhýn CNBC-ge.

Stefanı Poýp dúısenbiden bastap Boeing Commercial Airplanes basshysy bolyp taǵaıyndaldy, al Stıv Mollenkopf basqarmanyń jańa tóraǵasy bolyp taǵaıyndaldy jáne jańa bas dırektordy izdeýge jetekshilik etedi.