Bobyrjan Momynov IBF tıtýly úshin ýkraınalyqpen jekpe-jek ótkizedi

NUR-SULTAN. QazAqparat – Kásipqoı rıngte jeńilip kórmegen qazaqstandyq boksshy Bobyrjan Momynovtyń (12-0, 8 KO) kezekti jekpe-jeginiń datasy belgilendi, dep habarlaıdy QazAqparat Sports.kz-ke silteme jasap.

BoxRec.com. aqparaty boıynsha, Bobyrjan 27 naýryzda Ekaterınbýrgte (Reseı) ótetin boks keshine qatysýshylardyń biri bolady. Ol jartylaı orta salmaqtaǵy IBF Baltic bos chempıony ataǵy úshin Ýkraınanyń jeńilip kórmegen ókili Edýard Skavınskıımen (13-0, 7 KO) kezdesedi. Jekpe-jektiń formaty – on raýnd.

Momynovtyń sońǵy aıqasy 2020 jyldyń 27 qyrkúıeginde qazanda (Reseı) ótken edi. Onda ol tóreshilerdiń kópshilik daýsymen reseılik Vagınak Tamrazıannan (17-8, 5 KO) basym bolyp, jartylaı orta salmaqtaǵy IBF Eurasia chempıony bos ataǵyn jeńip aldy.

Skavınskıı óziniń aldyńǵy jekpe-jegin 12 qyrkúıekte sol Ekaterınbýrgte ótkizdi – ol belarýs Dmıtrıı Atrohovty (16-8, 7 KO) jeńgen bolatyn.