Blokcheınge senýge bola ma
TMD men Reseı boıynsha IDC kompanııasynyń vıtse-prezıdenti Robert Ferıshtiń aıtýynsha, búginde álem boıynsha blokcheın texnologııalaryna qyrýar qarjy salynady. IDC-diń esebi boıynsha bıyl ol qarjynyń kólemi 2,1 mlrd dollarǵa jetedi.
«Bul jerde biz Bıtkoın men Rıpl sııaqty krıpatovalıýtany alyp otyrǵan joqpyz. Negizi, blokcheınge salynatyn ınvestıtsııa ósedi. Boljamǵa sáıkes, 2021 jylda ol qarjynyń kólemi 10 mlrd dollarǵa deıin jetetin bolady», - dedi R.Ferısh búgin Tsıfrlandyrý jónindegi xalyqaralyq sarapshylardyń otyrysynda.
Onyń sózine qaraǵanda, blokcheın texnologııasyn áli de jetildirý kerek. Ony synaqta ótkizý kezeńi aıaqtalǵan joq. Al keıbir máselelerdi sheshý úshin taǵy ýaqyt qajet bolady.
«Blokcheın bizge ne beredi? Ony «ınternettiń kommertsıalızatsııasy» dep ataıdy. Sosyn tsıfrlyq aktıvterdi basqarýdyń birden bir quraly bolyp sanalady. Al memlekettik sektorda ony jan-jaqty qoldanýǵa bolady. Ol arqyly biraz qyzmetterdiń tıimdiligin arttyrýǵa múmkindik bar. Jeke kýálikti shyǵarý, ıdentıfıkatsııa, jyljymaıtyn múlikti tirkeý, salyqtyq esep berý, tipti saılaýshylardyń tizimin de jasaýǵa bolady», - dep atap kórsetti R.Ferısh.
Sarapshynyń oıynsha, blokcheındi qoldaný úshin Qazaqstannyń osy saladaǵy bilikti mamandary bolýy qajet. Sebebi atalǵan júıeni qoldanýdyń naqty strategııasyn jasap shyǵarǵan jón.
Aıta keteıik, búgin Astana ekonomıkalyq forýmy aıasynda Tsıfrlandyrý jónindegi xalyqaralyq sarapshylar keńesiniń otyrysy ótti. Sol jerde Amazon-nyń bas menedjeri Tonı Van Den Berg Qazaqstanda elektrondy saýda-sattyqty damytý boıynsha keńes berdi. Al Estonııanyń eks-prezıdenti Toomas Hendrık Ilves óz elinde tsıfrlandyrýdyń qalaısha iske asqanyn aıtyp berdi. Búginde atalǵan memlekette úsh-aq qyzmetti alý úshin adam ózi kelýi kerek. Qalǵanyn onlaın rejımde jasaýǵa bolady.
Foto: business-vector.info