Blokcheın týraly bestseller kitaptar alǵash ret qazaq tilinde jaryq kórdi
Astanada kásipker, metsenat, Altyn Qyran Foundation qoǵamdyq qorynyń negizin qalaýshy Islambek Saljanovtyń bastamasymen stýdenttermen kezdesý ótti.
Jıynda «Qazaq tili» halyqaralyq qoǵamynyń prezıdenti Raýan Kenjehanuly, «Qazposhta» AQ basqarma tóraǵasy Ásel Janasova, Ulttyq akademııalyq kitaphananyń dırektory Ǵazıza Nurǵalıeva jáne Blokcheın tehnologııalary men derekter ortalyqtary qaýymdastyǵynyń basqarma tóraǵasy Dáýren Qarashev sóz sóıledi.
Shara barysynda Islambek Saljanov qazaq tiliniń bilim berýdegi ózektiligine toqtalyp, kitaptardy qazaqsha aýdarý — elimiz úshin basty mindetterdiń biri ekenin jetkizdi.
Sondaı-aq, elimizdegi barlyq qalalyq jáne aýdandyq kitaphanalarǵa 8 myń dana kitap tapsyrylatynyn habarlady.
«Búgin biz, Altyn Qyran Foundation, Qazaqstan blokcheın tehnologııalary jáne derekter ortalyqtary qaýymdastyǵy, „Qazaq tili“ halyqaralyq qoǵamymen, sondaı-aq Ulttyq akademııalyq kitaphanamen jáne „Qazposhta“ AQ-men birlesip atqarǵan ıgi isimizdi bóliskimiz keledi. Qazaq tilindegi jańa tehnologııa týraly tórt álemdik bestseller elimizdiń barlyq qalalyq jáne oblystyq kitaphanalarynyń sórelerine jiberiledi. Olar — „Blokcheın tehnologııasy“, „Aqshanyń qysqasha tarıhy“, „Krıptovalıýta dáýiri“ jáne „Aqıqat mashınasy“. Bul — eń qoljetimdi jáne blokcheın tehnologııasy, krıptoındýstrııa, WEB3 qandaı ekeni jáne progress qaıda jatqany týraly óte qyzyq 4 álemdik kitap», — dedi metsenat.
Bul kitaptardyń bári onlaın formatta «Altyn qyran» qorynyń resmı saıtynda tur.
«Qazir biz óte kúrdeli kezeńde ómir súrip jatyrmyz. Bárimizge blokcheın tehnologııasy, jasandy ıntellekt, zattar ınterneti, keńeıtilgen vırtýaldy shyndyq jáne t. b. jańa tehnologııalardy meńgerý kerek. Al bolashaqta olarǵa ózimiz de bir nárse qosýǵa tıispiz. Bul tehnologııalar áli damý satysynda. Al biz, qazaqstandyqtar, eń aldymen, jastar osy úderisterdiń basy-qasynda bolýymyz kerek. Bul kitaptardy elimizdiń barlyq 168 aýdandyq kitaphanasyna jetkizý arqyly Qazaqstannyń aýyl jastarynyń jahandyq ınnovatsııalyq bilimge qol jetkizýine múmkindik beremiz. Kitaptar ár qazaqstandyqqa onlaın qoljetimdi, bul olardyń ınnovatsııalyq tehnologııalardy meńgerýine jol ashady», — dedi spıker jastarǵa.
Sondaı-aq sharada Blokcheın tehnologııalary jáne data ortalyqtary qaýymdastyǵynyń basqarma tóraǵasy Dáýren Qarashev «Blokcheın, krıptoındýstrııa jáne Web3 degenimiz ne?» degen taqyrypta baıandama jasady.
«Blokcheın jańa tehnologııa men ınnovatsııalardy damytýǵa aıtarlyqtaı áser etedi. Búginde jas kásipkerler ortalyqtandyrylmaǵan jobalardy qurý, qarjylyq ınklıýzııany jaqsartý jáne bilim, úkimet, energetıka, logıstıka, densaýlyq saqtaý jáne ekonomıkamyzdyń basqa sektorlary sııaqty ártúrli salalardaǵy ashyqtyqty arttyrý úshin blokcheındi paıdalanyp júr», — dedi ol.
Kitaptardyń elektrondy nusqasyn myna siltemeden júktep alýǵa bolady: