Blok-beket arqyly elordaǵa zańdy túrde kimder kire alady
«Blok-beketten tek zańdy túrde ótýge bolady. Ártúrli jaǵdaı kezdesedi. Biraz kún buryn bir taksıst 50 myń teńge berip, blok-beketten ótip ketpek bolǵan. Biraq onyń áreketine tosqaýyl qoıylyp, taksıst 15 kúnge qamaldy. Al ótip ketpek bolǵan basqa azamattarmen polıtsııa qyzmetkerleri tıisti jumys júrgizip jatyr. Bizge drondar kómektesedi. «Sergek» kameralary bar. Qatań baqylaý qoıylǵan. Blok-beketten zańsyz ótý múmkin emes!» - dedi Altaı Kólginov Tengrınıýs.kz portalyna bergen tikeleı efırdegi suhbatynda.
Shahar basshysy sonymen qatar blok-beket arqyly kimderdiń zańdy túrde qalaǵa kire alatynyn aıtyp berdi.
«Blok-beketten eń birinshi kezekte ótetinder – azyq-túlik pen taýar ákelýshiler. Olar kedergisiz kire alady. Olar úshin – «jasyl dáliz». Onyń ózinde júk kóligi kirip, júkti túsirip, qaıta shyǵyp ketýi tıis. Tranzıttik aǵym boıynsha da sol. Bizdiń qalada 87 shaqyrymdyq aınalma joldyń baryn bilesiz. Qaraǵandy nemese Kókshetaý jaqtan keletinder Pavlodar jaqqa tranzıtpen qalaǵa kirmeı-aq aınalma jolmen kete alady», - dedi ol.
Altaı Kólginov sondaı-aq issaparda nemese otbasylyq jaǵdaıǵa baılanysty basqa qalada bolǵandardy arnaıy ruqsatpen qalaǵa kirgizip, shyǵarýǵa bolatynyn jetkizdi.