Blogerler saılaý kezinde qalaı jumys isteıdi

NUR-SULTAN. QazAqparat - Qazaqstan zańgerler odaǵynyń tóraǵasy Serik Aqylbaı blogerlerdiń qandaı jaǵdaıda barlyq kandıdattarǵa birdeı qyzmet kórsetýge mindetti ekenin aıtyp berdi, dep habarlaıdy QazAqparat tilshisi.

Qazaqstan zańgerler odaǵy tóraǵasynyń aıtýynsha, blogerlerdiń elimizde ınternet BAQ nysany retinde tirkelýge quqyǵy bar. Eger ol osy quqyǵyn paıdalanyp, BAQ retinde zańdy túrde tirkelse, saılaý naýqanyna aralasý boıynsha birqatar mindetter júkteledi.

«Bloger BAQ túrine jata ma?» degen suraq jıi qoıylyp júr. Zańgerler odaǵynyń pikirinshe, blogerler BAQ quraly retinde zańdy túrde tirkelse ǵana mindetti túrde ár kandıdatqa teń qyzmet kórsetýi tıis. Al tirkelmese, jeke tulǵa retinde, zań sheńberinde óz qalaýymen aqparat jarııalaı alady. Men bul másele boıynsha kóp blogermen sóılestim. Ázirge men sóıleskenderdiń eshqaısysy BAQ nysany retinde tirkelmegen», - deıdi zańgerler odaǵynyń tóraǵasy.

Onyń aıtýynsha, BAQ nysany retinde tirkelmegen blogerler ózge de ınternet paıdalanýshylar qoldanatyn zańnamany basshylyqqa alýy tıis.

«Bireýdiń jeke basyna til tıgizý, jalǵan aqparat berý, qoǵamdyq arazdyq týdyratyn málimetter jasaý áreketi zań boıynsha jaýapqa tartylatynyn bilesizder. Bul talap BAQ retinde tirkelmegen blogerlerge de qatysty», - deıdi Serik Aqylbaı.