BQO joldary qashan jaqsarady: Ulttyq ortalyq fılıaly basshysymen suhbat

ORAL. QazAqparat – Qazaqstan Prezıdenti jańa Joldaýynda avtokólik joldarynyń qurylysy máselesi sheshimin tabýǵa tıistigin aıtty. «Qazir onyń sapasy syn kótermeıdi. Tıisti jumystar ýaqtyly jáne sapaly jasalmaıdy. Jemqorlyq beleń alyp tur, báseke de joqtyń qasy. Munyń bári – osy salada ábden tamyr jaıǵan kemshilikter. Sondyqtan jyl sońyna deıin naqty sharalar qabyldaý qajet. Mindetin adal atqarmaǵan barlyq kompanııa zań boıynsha jaýapqa tartylady. Bul máselege men basa nazar aýdaramyn. Baqylaýdy kúsheıtip, jańa normatıvtik qujattar qabyldaý kerek», dep atap kórsetti. Osyǵan oraı QazAqparat tilshisi «Jol aktıvteri sapasynyń ulttyq ortalyǵy» RMK Batys Qazaqstan fılıalynyń dırektory Abylaıhan Alshynbaevpen suhbattasqan edi.

- Abylaıhan Erboluly, sizdiń oıyńyzsha, avtokólik joldarynyń qurylysy nelikten oıdaǵydaı emes, ne sebepti jemqorlyq beleń alyp otyr? Salada tamyr jaıǵan kemshilikterdi joıý baǵytynda ne atqarylýy kerek dep oılaısyz?

- Iá, ókinishke qaraı, ondaı olqylyqtar bar. Degenmen, «Jol aktıvteri sapasynyń ulttyq ortalyǵy» respýblıkalyq memlekettik kásipornynda sybaılas jemqorlyqtyń aldyn alý jáne sybaılas jemqorlyqqa qarsy mádenıetti damytý boıynsha belsendi jumys júrgizilip jatyr. Máselen, sapa ortalyǵy buǵan deıin «Sybaılas jemqorlyqqa qarsy basqarý júıesi» halyqaralyq standarty boıynsha sertıfıkatyn aldy. Sonymen qatar kásiporynnyń 30 shaqty qyzmetkeri ISO 37001:2016 sáıkes «Sybaılas jemqorlyqqa qarsy menedjment júıesin ázirleý» sertıfıkattaryna ıe boldy. Jyl saıyn osy keleńsiz qubylystyń sebepteri saralanyp, jemqorlyq táýekelderine taldaý jasalady. Sonymen qatar ony túpkilikti joıý, qyzmetkerlerdiń sybaılas jemqorlyqqa qarsy mádenıetin arttyrý boıynsha da is-sharalar ótip turady. Zerthanalyq synaqtar tsıfrlyq júıege kóshiriledi. Jemqorlyq táýekelderi joǵary nysandar beınebaqylaýmen qamtylady. Bul da sybaılas jemqorlyq táýekelderin azaıtýǵa baǵyttalǵan naqty qadamdardyń biri dep esepteımiz.

- Uzaq jyldar boıy aıtylyp, jazylyp, ábden jaýyr taqyrypqa aınalǵan Kaztalov-Jánibek-RF shekarasy jáne Ónege-Bısen-Saıqyn avtojolynyń qurylysy uzaqqa sozylyp ketti. Buǵan baılanysty Memleket basshysynyń arnaıy tapsyrma bergeni málim. Bıyl atalmysh joldyń astyńǵy tósemin bitirip, kelesi jyly tolyq aıaqtaý kózdelýde. Buǵan baılanysty ne aıtasyz?

- Iá, jıi synǵa ushyrap júrgen Batys Qazaqstan óńirindegi jol qurylysyna, onyń sapasyna qatysty másele ózekti ekeni ras. Degenmen, dál qazirgi ýaqytta respýblıkalyq mańyzǵa ıe Ónege-Bısen-Saıqyn avtojolynyń qurylysy júrip jatyr. Ózińiz aıtqandaı, bıyl tómengi tósemin tolyqtaı aıaqtaý kózdelgen. Kelesi jyly qurylys jumystary aıaqtalady. Bul baǵytta 245 shaqyrymnyń 185 shaqyrymy jańa asfaltpen qamtyldy. 60 shaqyrym qaldy.

- Bul jumystarǵa jetkilikti qarajat bólindi me?

- «QazAvtoJol» UK AQ málimetine súıensek, eki joba boıynsha bıyl 31,5 mlrd tenge bólingen. Sý ótkizgish qubyrlar men kópirlerdiń qurylysy 85 paıyz aıaqtaldy. Mal aıdaý ótkelderin salý jumystary tolyǵymen máresine jetti. Sonymen qatar jańa asfalt tóselip, qozǵalys qamtamasyz etildi. Olardy taratyp naqty aıtar bolsaq, Ónegeden Bısenge, Saıqynnan Han ordasyna baratyn jolǵa deıin, sondaı-aq Kúıgenkólden Jánibekke, Kaztalovtan Aşysaı ózeni arqyly ótetin kópirge deıin, Aşysaıdan ári qaraı taǵy 15 shaqyrymǵa jol salyndy. Jyl basynan beri 32 256 vagon kelip, 2,2 mln qıyrshyq tas tasymaldandy. Qazirgi ýaqytta ınertti materıaldy tasymaldaýǵa 1 800-ge jýyq vagon tartyldy.

Aımaqtaǵy taǵy bir irgeli joba Podstepnyı-Terekti avtojolynyń qurylysy byltyr bastaldy. Eki shetki lot boıynsha jumys júrip jatyr. Bıyl 17 shaqyrym jol salyndy. Aıaqtaý merzimi – 2025 jyl.

- Batys Qazaqstan oblysynda respýblıkalyq joldar qurylysynyń sapasyn baqylaý barysynda qandaı kemshilikter anyqtaldy, kinálilerge qandaı shara qoldanyldy?

- Bizdiń «Jol aktıvteri sapasynyń ulttyq ortalyǵy» RMK BQF qyzmetkerleri jyl basynan joldardy 300 ret tekserip, myńǵa jýyq synama aldy, onyń ishinde 370 synama talapqa saı kelmedi. Osy tekserý barysynda 100-den asa aqaýlyq anyqtalyp, jaýapty mekemelerge 250 usynymhat joldandy. Jalpy, kásipornymyzdyń ataýy aıtyp turǵandaı, bizdiń eń basty nazar aýdaratyn nársemiz, ol – sapa máselesi. Eger merdigerler óz mindettemelerine saldyr-salaq qaramaı, barlyq jumysty jaýapkershilikpen atqarsa, óńir joldary da sapaly salynar edi. Ol, saıyp kelgende, aımaq turǵyndarynyń sapaly ómir súrýine, áleýmettik ahýalynyń arta túsýine oń yqpal eter edi. Sondyqtan, biz de kúni keshegi Prezıdent Joldaýynan oń ózgerister kútemiz. Joldaýda bizdiń salaǵa qatysty óte mańyzdy ózgerister týraly aıtyldy. Sonyń biri – QR Kólik mınıstrliginiń óz aldyna bólek vedomstvo retinde qurylýy. Joldaýda osy mınıstrliktiń quramyndaǵy jol qurylysy salasyna zor jaýapkershilik júktelip otyrǵany atap ótildi. Biz, ıaǵnı «Jol aktıvteri sapasynyń ulttyq ortalyǵy» RMK qyzmetkerleri kúndelikti qyzmetimizde Joldaý júktegen barlyq tapsyrmalardyń der kezinde ári sapaly oryndalýyna barlyq kúsh-jigerimizdi salamyz. Oǵan barlyq jaǵdaı bar. Tek, árqaısysymyzda jaqsy jolmen jarqyn ómirge qadam bassaq degen yqylas-nıet pen jaýapkershilik bolýy tıis dep esepteımin.

- Áńgimeńizge rahmet! Qyzmetińizge sáttilik tileımiz.

Eske sala keteıik, budan buryn Bókeı ordasy men Jánibek baǵytyndaǵy jol qurylysy 2023 jyly aıaqtalatynyn jazǵan edik.

Sondaı-aq BQO-da Bókeı ordasy aýdanyna aparatyn jol qurylysy bıyl bite me – mınıstr jaýap berdi.