BQO: Jeltoqsan qurbany Gúlzada Qalelovany eske alý sharalary ótkizildi
Aldymen Gúlzadanyń týǵan jeri – Aqjaıyq aýdany Іlbishin aýylynda «Qyrshyn ketken qaharman» degen taqyrypta ótken is-sharaǵa Almatydan, oblys ortalyǵynan kelgen Jeltoqsan ardagerleri jáne jergilikti jurtshylyq qatysty.
Jınalǵandar Gúlzada Qalelovanyń qalaı aqtalǵany týraly aıtyp, estelikterimen bólisti. Marqum jerlengen qorymda onyń rýhyna quran baǵyshtalyp, aýylda as berildi.
Gúlzada týraly Oral qalasyndaǵy Dostyq úıinde «Jeltoqsanda qurban bolǵan názik gúlin Batystyń, Óshire almas asyl jeli ýaqyttyń» degen taqyrypta «Batys-Jeltoqsan» qoǵamdyq birlestigi uıymdastyrǵan dóńgelek ústel otyrysynda da aıtyldy.
«Qoǵamdyq kelisim» KMM-nyń bólim basshysy Jamal Ihsanova munyń óte qajetti is-shara ekendigin, Gúlzada Qalelovany batyr qyzymyz dep sanaıtynyn jetkizdi.
Jýrnalıstıka ardageri Bolat Esqalıev aqjaıyqtyq ustaz Aldabergen Sársekovtiń osy isti qalaı qolǵa alǵanyn aıtyp berdi.
«1997 jyly saıası qýǵyn-súrgin qurbandaryn aqtaýǵa baılanysty oblystyq muraǵatta bolǵan kezimizde eski papkilerdiń arasynan Gúlzada Qalelovaǵa qatysty jańalaý papkige tap boldyq. Ondaǵy «óte qupııa» degen jazý syzylmaǵan eken. Aldabergen sol boıda kóshirip jazyp aldy. Biraq shyǵarda onyń jazǵandaryn alyp qaldy. Soǵan qaramastan, Aldabergen Sársekov Gúlzadanyń týyp-ósken aýylyna baryp, ata-anasy, jaqyn-jýyqtarymen sóılesip, aqıqat jolyndaǵy izdenisin toqtatqan joq», - deıdi B.Esqalıev.
«Gúlzada týraly zerttegenime 26 jyl boldy. Anasy Qalampyrdyń aıtýy boıynsha Jeltoqsan oqıǵasynan keıin Gúlzada jaqyn-jýyqtarynyń úıin panalap júrgen. 1987 jyly aqpannyń 5-ine deıin ustalmaǵan. Aqpannyń 4-inde úıine jazǵan sońǵy hatynda da qaısar qyz bári jaqsy, senderdi saǵyndym dep, óziniń qýǵynǵa túskenin bildirmegen. «Qyzyma jabylmaǵan jala joq, sony aqtashy», dep anasy amanattap edi. 2021 jyly jeltoqsanda «Aqjaıyq» telearnasynda jýrnalıst Munaıdar Balmolda júrgizgen «Tarıhtan taǵylym» degen habarda Gúlzada Halelovanyń túk kinási joq ekendigin, onyń aqtalýy kerektigin aıtyp edim. Mine, osyny Almatydaǵy jeltoqsanshylar ilip áketip, isti aıaǵyna deıin jetkizip otyr», - dedi A.Sársekov.
Almatydan arnaıy kelgen jeltoqsanshylardyń biri, «Jeltoqsan aqıqaty» qoǵamdyq birlestiginiń tóraǵasy Beısenbaı Saıfolda Gúlzada Qalelovany aqtaýdyń ońaıǵa túspegendigin jetkizdi.
«Brejnev alańynan Kalının ishki ister basqarmasyna jetkizilgen kóptegen qazaq jastarynyń arasynda Gúlzada Qalelovanyń sýreti bar eken. Saraptama júrgizý nátıjesinde Gúlzadanyń sýreti ekendigi anyqtaldy. Ádette adamnyń qaıtys bolý týraly kýáliginde neden ólgeni jazylatyny belgili. Al Gúlzadanyń kýáliginde ol jazylmaǵan. Biraq ólgendik týraly aktide mıy ezilgen dep anyq kórsetilgen. Tabandy jumystar nátıjesinde Almaty qalalyq prokýratýrasynan Gúlzadanyń saıası qýǵyn-súrgin qurbany bolyp tanylǵany jóninde anyqtama aldyq. Aldaǵy ýaqytta qazaqtyń batyr qyzyn máńgi este qaldyrý baǵytynda sharalar atqarylýy kerek», - dedi B.Saıfolda.
«Apamnyń 37 jyldan keıin aqtalǵanyna shúkirshilik etemin. Qazir Qalelovtar otbasynan men ǵana qaldym. Ákem 1994 jyly dúnıeden ozsa, anam 2003 jyly Oral qalasynda avtobýsta bara jatqanda júregi ustap, qaıtty. Otbasynda balalardyń úlkeni Gúlzada bolsa, aǵam Serik 2001 jyly aýyryp, kóz jumdy. 1987 jyldan bastap bizge tynyshtyq bergen joq. Keıin Oralǵa kóshsek te, solaı boldy. Sońyma túskeni sondaı, aqyry Aqmola oblysyna kóship kettim. Qazir Zerendi aýdany Prırechnyı aýylynda turamyn. Endi ondaı zaýal eshkimniń basyna kelmesin», - dedi Gúlzadanyń inisi Mereke Nábıuly.
Eske sala keteıik, budan buryn batysqazaqstandyq Gúlzada Qalelovanyń Jeltoqsan qurbany dep tanylǵanyn jazǵan bolatynbyz.