BQO: Jańaqalada Beıbitshilik eskertkishi men Dańq memorıaly ashyldy (FOTO)
Aýdan ortalyǵyndaǵy saıabaqta Beıbitshilik eskertkishi ashyldy. Quny 5 mln. teńgege baǵalanǵan eskertkishtiń avtory - oraldyq músinshi Rafael Shamsýtdınov. Bıiktigi 8 metr eskertkishte qanquıly soǵystan jaryn, balasyn, baýyrlaryn kútip, sábıin baýyryna basyp, oń qolymen beıbitshilik belgisi sanalatyn kógershin qusyn ustap turǵan azaly ananyń beınesi kórinis tapqan.
M.-S.Babajanov atyndaǵy kóshe boıyndaǵy «Jastar» saıabaǵynda Dańq memorıaly boı túzedi. Onyń qos qanatynda Jańaqala aýdanynan shyqqan Sotsıalıstik Eńbek Erleri, Batyrlar, túrli memlekettik nagrada ıegerleri, aqyn-jazýshylar jáne aýdan, oblys, respýblıka kóleminde basshylyq qyzmet atqarǵan qaıratkerler men sport sheberleriniń esimderi jazylǵan. Ortasynda aqyndardyń eli ekenin aıqyndap turǵan qalamushty stella jáne kúıshiler mekeni ekenin bildiretin qasıetti dombyra beınelengen. Dańq memorıalyn merdiger «ABK Pordnes» JShS qurylys kompanııasy 5 mln. 396 myń teńgege turǵyzdy.
Aýdan ákimi Lavr Haıretdınovtiń aıtýynsha, Elbasy Nursultan Nazarbaevtyń «Nurly jol - bolashaqqa barar jol» atty Joldaýynda atalyp ótilgenindeı, «Máńgilik el» ataný úshin tarıhty umytpaı, ólkede órnekti iz qaldyrǵan tulǵalardy qasterleý - paryz. Bul - aýdanda sońǵy jyldary qolǵa alynǵan jumystardyń jalǵasy. Osyǵan deıin kúıshi Mámen, onyń murasyn jalǵastyrýshylardyń biri, QR halyq ártisi Tuıaqberdi Shámelovke kesene ornatylsa, kúı astanasy atanyp ketken Jańaqala aýdany ortalyǵyndaǵy mádenıet úıi aldynda Qurmanǵazy, Dına, Oqap Qabıǵojın, Qalı Jantileýov syndy ataqty dombyrashylardyń músinderi qoıyldy. Oǵan qosa Kópjasar aýylyndaǵy D.Nurpeıisova atyndaǵy orta mekteptiń aýlasynda kúı anasynyń eskertkishi eńse tiktedi. Sondaı-aq Bókeı hannyń osy araǵa aıaldap, kóshkeni jóninde, Tastóbe shaıqasyna arnalǵan eskertkish belgiler de bar.
Aıta keteıik, Bókeı men Jáńgirdeı handardyń, Isataı men Mahambetteı batyrlardyń izderi qalǵan Jańaqaladan keńes dáýirinde tórt birdeı Keńes Odaǵynyń Batyry, 18 Sotsıalıstik Eńbek Eri, basqa da kóptegen tanymal tulǵalar túlep ushqan.