BQO turǵyny asa iri kólemdegi esirtkimen qolǵa tústi

ORAL. QazAqparat – Oral qalasynyń turǵyny «Quqyqtyq tártip» jedel aldyn alý is-sharasy barysynda asa iri kólemdegi esirtkimen qolǵa tústi, dep habarlaıdy QazAqparat tilshisi.

BQO polıtsııa departamentiniń baspasóz qyzmeti málim etkendeı, 43 jastaǵy turǵynnan ısi erekshe ashyq-qońyr tústi suıyq zat quıylǵan 12 plastıkalyq bótelke jáne taǵamdyq kóknár salynǵan polıetılen paketter tabylyp, tárkilendi.

BQO boıynsha sot saraptamasy ınstıtýtynyń qorytyndysyna sáıkes zerttelgen zat salmaǵy 4,2555 ekstraktsııalyq apıyn bolyp shyqty.

Bul - asa iri kólemdegi esirtki.

Atalǵan derek boıynsha QR QK 296-baby 4-bóligine sáıkes (ótkizý maqsatynsyz esirtki, psıhotroptyq zattarmen, sol tektestermen zańsyz jumys isteý) sotqa deıingi tergeý amaldary júrgizilýde.

Bul bap boıynsha aıypty dep tanylǵan adam úsh jyldan jeti jylǵa deıingi merzimge bas bostandyǵynan aıyrýǵa jazalanady.

Sondaı-aq Oral qalasynda esirtki satqan eki turǵyn ustaldy. 1980 jylǵy turǵyn saraptama qorytyndysyna sáıkes salmaǵy 0,79 gramm mefedron ótkizgen. Tintý kezinde odan travmatıkalyq tapanshaǵa uqsas zat tárkilendi, qazirgi ýaqytta ballıstıkalyq saraptama taǵaıyndaldy.

Sol sekildi 1980 jylǵy taǵy bir turǵyn 3,31 gramm marıhýanany satqany úshin ustaldy.

Osy eki oqıǵa boıynsha QR QK 297-baby 1-bóligine sáıkes sotqa deıingi tergeý amaldary júrgizilýde. Bul bap boıynsha aıypty dep tanylǵan adam 5 jyldan 10 jylǵa deıin bas bostandyǵynan aıyrylýy múmkin.

Eske sala keteıik, budan buryn Oralda asa iri kólemde esirtki tasymaldaǵan 19 jastaǵy qyzdyń ustalǵanyn jazǵan bolatynbyz.