BQO turǵyny 4 jasar ógeı ulynyń aıaq-qolyn baılap, qoraǵa qamap qoıǵan

ORAL. QazAqparat – BQO turǵyny tórt jastaǵy ógeı ulyn birneshe saǵat boıy qorada qamap ustaǵan, dep habarlaıdy QazAqparat tilshisi.

BQO polıtsııa departamentiniń resmı ókili Bolatbek Belgibekov málim etkendeı, oqıǵa Qaztalov aýdany Bostandyq aýylynda bolǵan.

1991 jylǵy turǵyn tórt jasar ógeı ulyn saǵat 08.00-11.10 aralyǵynda qoraǵa qamap qoıǵan.

Qazirgi kezde Qaztalov aýdany polıtsııa bólimi QR QK 126-baby 2-bóligine (bas bostandyǵynan zańsyz aıyrý) sáıkes tergeý amaldaryn júrgizýde.

Aýdandyq bilim bóliminiń basshysy Samal Jangereevanyń naqtylaýynsha, balany anasynyń azamattyq nekedegi jubaıy aıaq-qolyn baılap, qoraǵa qamap qoıǵan. Bul týraly balanyń anasy balabaqshaǵa baryp aıtqan. Balabaqsha tárbıeshileri balany baılaýly kúıinde taýyp, ýchaskelik polıtsııaǵa habar bergen. Sodan keıin ýchaskelik polıtsııa qyzmetkeri otbasyny aýdandyq polıtsııa bólimine jetkizdi.

Balanyń anasy 1997 jyly týǵan, jumyssyz, aqyl-esiniń tolyq damymaǵany baıqalady, mektepte túzetý synybynda oqyǵan.

Ógeı ákesi de jumyssyz, aqyl oıynda kemistigi bar, nevropatolog dárigerdiń esebinde turady. Buǵan deıin otbasy balanyń ógeı ákesiniń ata-anasynyń úıinde turyp kelgen. Alaıda kelispeýshilikke baılanysty sol aýyldaǵy aǵa-jeńgesine ketip qalǵan.

Otbasymen áńgime barysynda balany baılap qoıýǵa ógeı ákesiniń jeńgesi májbúrledi degen túsinikteme berildi.

«Qazirgi kezde balanyń jaǵdaıy jaqsy bolǵanymen, aýrýhanada jatyr. Balaǵa jańa kıim-keshek, tamaq jáne oıynshyq alyp berildi. Ol 17 maýsym kúni aýrýhanadan shyǵady. Sodan keıin balany ornalastyrý máselesi sheshiledi», dedi QazAqparat tilshisine S.Jangereeva.

Eske sala keteıik, budan buryn ógeı qyzyna seksýaldyq sıpattaǵy zombylyq jasaǵan BQO turǵynynyń 22 jylǵa sottalǵanyn jazǵan bolatynbyz.