BQO turǵyndary Chia Tai Pharmaceutical pıramıdasyna salǵan 769 mln teńgesinen aıyryldy

ASTANA. QazAqparat - QMA Batys Qazaqstan boıynsha departamenti qarjy pıramıdasyn basqarý faktisi boıynsha «Chia Tai Pharmaceutical» kompanııasynyń ókilderine qatysty sotqa deıingi tergeý júrgizip jatyr, dep habarlaıdy QazAqparat.

Bul kompanııa ózin ınvestıtsııalyq uıym retinde kórsetip, joǵary jáne turaqty tabys ákelýge ýáde berdi.

Sonymen birge, «Chia Tai Pharmaceutical» jeke tulǵalardan aqshany alyp, kásipkerlik qyzmetke paıdalanbaı, qatysýshylar arasynda qaıta bólgen.

Kelgen shyǵyn kólemi búginde 769 mln teńgeden asady.

Qazirgi ýaqytta qarjy pıramıdasyn uıymdastyrdy degen kúdikti ustalyp, sot sanktsııasymen eki aı merzimge qamaýǵa alyndy.

Sotqa deıingi tergeý jalǵasyp jatyr. QR QPK 201-babyna sáıkes ózge aqparat jarııalanbaıdy.