21:14, 27 Tamyz 2023

BQO turǵyndary Atyraýdaǵy 10 shaqyrymdyq marafonnyń jeńimpazy atandy

ATYRAÝ. QazAqparat – Batys Qazaqstan oblysynyń turǵyndary Atyraýdaǵy 10 shaqyrymdyq marafonnyń jeńimpazy atandy, dep habarlaıdy QazAqparat tilshisi.

Atyraý oblystyq din isteri basqarmasy men «Járdem-Atyraý» qoǵamdyq qorynyń uıymdastyrýymen 30 tamyz – Qazaqstan Respýblıkasynyń Konstıtýtsııasy kúnine oraı 10 shaqyrymǵa júgirý marafony ótti.

«Marafon salamatty ómir saltyn nasıhattaý, jastardy buqaralyq sportpen belsendi aınalysýǵa shaqyrý maqsatynda uıymdastyrylyp otyr. Táýelsiz elimizdiń gúldenýine ár azamat óz úlesin qosýy kerek. Bul úshin salamatty ómir saltyn ustanýymyz qajet. Bárimiz Ata zańymyzdy dáriptep, Otanymyzdyń patrıoty bolaıyq», - dedi din isteri basqarmasy basshysynyń mindetin atqarýshy Muhtar Іzǵalıev.

Onyń aıtýynsha, marafonǵa qatysý úshin 700-ge jýyq adam tirkelgen. Marafonǵa atyraýlyqtarmen birge, Batys Qazaqstan jáne Aqtóbe oblysynyń turǵyndary qatysty.

Máre syzyǵyn kesken eń úlken qatysýshynyń jasy – 79-da, al eń kishisi – 12 jasta. Máselen, 50 jasqa deıingi erler arasynda máre syzyǵyn BQO-nyń turǵyny Jaras Aıtýarov alǵash bolyp kesti. Ekinshi oryndy taǵy bir batysqazaqstandyq Ersaıyn Qanybek ıelendi. Al, atyraýlyq Salamat Satıhov márege úshinshi bolyp jetti.

Áıelder arasynda birinshi orynǵa Batys Qazaqstan oblysynan qatysqan Jazıra Súıesinova ıe boldy. Ekinshi jáne úshinshi oryndardy atyraýlyq Janargúl Ermuhanova men Aınagúl Qýanyshova ıelendi.

Sondaı-aq, 50 jastan joǵary qatysýshylar arasynan atyraýlyq Asylbek Sıtalıev jeńimpaz atandy. Máre syzyǵynan Asqar Qazıev ekinshi, Esenbek Bilálov úshinshi bolyp ótti.

Eske sala ketelik, buǵan deıin Atyraýda daryndy balalarǵa arnalǵan sport mektep-ınternaty ashylǵanyn habarlaǵan edik.

Atyraý Atyraý oblysy Buqaralyq sport Konstıtýtsııa Sport

Joldasbek Shópeǵul

1993 jyly ál-Farabı atyndaǵy QazMUÝ-diń jýrnalıstıka fakýltetin bitirgen. Eńbek jolyn 1993 jyly respýblıkalyq «Egemen Qazaqstan» gazetinde tilshi bolyp bastaǵan. 2020 jylǵy aqpannan beri «Kazinform» halyqaralyq aqparat agenttiginde Atyraý oblysyndaǵy tilshisi bolyp jumys isteıdi.