BQO turǵyny aýyldasynyń shóbine ot qoıǵan: Tórt úıde 30 tonna pishen janyp ketti

<p>ORAL. KAZINFORM &mdash; Shyńǵyrlaý aýdany ortalyǵy Shyńǵyrlaý aýylynda birinen soń biri tórt úıdiń aýlasy otqa orandy.</p>

BQO TJ departamentiniń baspasóz qyzmetinen málim etkendeı, oqıǵa 1 qyrkúıek kúni tańmen boldy.

«Saǵat 07.11-de Shevtsov kóshesi, 16 mekenjaıynda jeke úıdiń aýlasynda 60 býma shóp (40 sharshy metr, 15 tonna) pen 70 sharshy metr qoranyń tóbesi órtendi. Sol ýaqytta Shevtsov kóshesi, 8/1 mekenjaıynda 15 býma shóp (20 sharshy metr, 3,7 tonna) jandy. Saǵat 07.30-da Ǵ.Muratbaev kóshesi, 36/1 mekenjaıynda 28 býma shóp (30 sharshy metr, 7 tonna) tıelgen tirkeme otqa orandy. Saǵat 07.59-da Amangeldi kóshesi, 59-úıdiń aýlasynda 20 býma shóp (24 sharshy metr, 5 tonna) jalynǵa sharpyldy. Oqıǵa ornynda órt sóndirýshiler jumys istep, «tilsiz jaý» aýyzdyqtaldy. Zardap shekkender joq. Barlyǵy 30,7 tonna shóp kúlge aınaldy. Aldyn ala málimet boıynsha tórt órt te qasaqana ot qoıýdan shyqqan», dep habarlady vedomstvodan.

BQO polıtsııa departamenti baspasóz qyzmetiniń naqtylaýynsha, aýyldasynyń pishenin órtep jibergen kúdikti ustaldy.

Ol qasaqana ot qoıyp, 1964 jylǵy turǵynnyń 60 býma shóbin órtep jibergen. Kelgen zalal – 800 myń teńge. 

Jedel izdestirý sharalary barysynda beınekameranyń kómegimen qolǵa túsken kúdikti sol aýyldyń 26 jastaǵy turǵyny bolyp shyqty. 

Qazirgi kezde QR QK 202-baby 1-bóligine (bótenniń múlkin qasaqana joıý nemese búldirý) sáıkes sotqa deıingi tergeý amaldary júrgizilýde.

Atalǵan bap boıynsha aıypty dep tanylǵan adam bes júzden eki myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne úsh júzden alty júz saǵatqa deıingi merzimge qoǵamdyq jumystarǵa tartýǵa ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.

Eske sala keteıik, budan buryn Oral qalasynda avtobýs órtengenin jazǵan bolatynbyz.