BQO teatrynda Muqaǵalıdyń «Qosh, mahabbat» týyndysy sahnalandy

ORAL. QazAqparat  - H.Bókeeva atyndaǵy Batys Qazaqstan oblystyq qazaq drama teatrynda Muqaǵalı Maqataevtyń «Qosh bol, mahabbat» shyǵarmasy boıynsha qoıylymnyń premerasy boldy, dep habarlaıdy QazAqparat tilshisi.

Spektakldi rejısser Samal Ábýov sahnalasa, sýretshisi - Qaıyr Orazǵalıev.

Qazaqtyń uly aqyndarynyń biri Muqaǵalı Maqataevtyń kózi tirisinde shyǵarmalary sahnalanbaǵany belgili. Tek ótken ǵasyrdyń sekseninshi jyldary Nurqanat Jaqypbaev pen Raıymbek Seıitmetov «Darıǵa júrekti» jurtshylyq nazaryna usynǵan bolatyn. Qazirgi kezde «Men umytylmaımyn», «Muqaǵalı-Farıza» spektaklderi qoıylyp júr.

«Qosh, mahabbat» dramasyn aqyn «Aq qaıyń» poemasynyń negizinde jazyp ketken. Árıne, kólemdi dúnıeni alyp shyǵý ońaı emes. Kúni búgin respýblıkamyzdyń basqa da teatrlarynda qoıylyp júrgen týyndynyń Oralda da sahnalanyp jatqany Muqaǵalı rýhyna taǵy bir taǵzym etý bolsa kerek. 

Spektaklde mádenıet salasynyń úzdigi Horlan Shamelova, Salaýat Túmenovpen qatar Aıjan Qaıyrova,  Daryn Muhtarov, Dýman Omarov, Aqjol Ihsan, Áıgerim Saǵadenova syndy jas ártister de oınaıdy.

Qoıylym barysynda jastardyń bir-birine degen adal sezimi, olardyń jolyna kedergisi bolǵysy keletin aram pıǵyl ıeleri, ata-ana aldyndaǵy paryzdy uǵyný da kórinedi. Jaqsydan úırený, jamannan jırený, adal mahabbat qudiretin kórermenderge jetkizý úshin shyǵarmany áli de shıryqtyra tússe, tipti jaqsy bolar edi.