BQO: sý tasqyny kezinde pyshaqtalǵan qutqarýshy aýrýhanada em alyp jatyr

<p>ORAL. KAZINFORM &mdash; Batys Qazaqstan oblysy Kaztalov aýdany Jalpaqtal aýylynda sý tasqynyna qarsy is-sharalarǵa qatysý barysynda pyshaq jaraqatyn alǵan 26 jastaǵy qutqarýshy aýrýhanada em alyp jatyr.&nbsp;</p>

BQO densaýlyq saqtaý basqarmasynyń baspasóz qyzmetinen málim etkenindeı, 26 jastaǵy azamat Jalpaqtal aýylyndaǵy №2 Kaztalov aýdandyq aýrýhanasynyń qabyldaý bólimine 31 naýryz kúni saǵat 18.00-de dene jaraqatymen júgingen.

«Qazirgi ýaqytta naýqas atalǵan aýrýhanada qajetti emin alýda. Jaǵdaıy ortasha dárejede aýyr, turaqty», - dep habarlady vedomstvodan.

BQO TJ departamenti baspasóz qyzmetiniń naqtylaýynsha, qutqarýshyǵa Jalpaqtal aýylynyń tusymen ótetin Qaraózen boıynda óziniń laýazymdyq mindetin atqaryp, kezekshilikte turǵan kezinde sol eldi mekenniń turǵyny pyshaq jaraqatyn salǵan.

Atalǵan qutqarýshy azamattyq qorǵaý organynda 2021 jyldan beri, al Jalpaqtal aýylyndaǵy №17 órt sóndirý beketiniń bólimshe komandıri laýazymynda 2023 jyldan beri qyzmet atqaryp keledi.

BQO polıtsııa departamentiniń baspasóz qyzmeti ýaqytsha ustaý ızolıatoryna qamalǵan kúdiktiniń jasy 30-da, sol Jalpaqtal aýylynyń turǵyny ekenin jetkizdi.

Kúni búgin QR QK 293-baby 3-bóligine sáıkes tergeý amaldary júrgizilýde. Bul bap boıynsha aıypty dep tanylǵan adam úsh jyldan jeti jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.

Eske sala keteıik, budan buryn BQO-da turǵyndarǵa kómektesýge barǵan qutqarýshyny pyshaqtaǵanyn jazǵan bolatynbyz.

Sondaı-aq polıtsııa qutqarýshyǵa pyshaq kezegen BQO turǵynyn ustady.