BQO statsıonarynda koronavırýspen jatqan jalǵyz naýqastyń jaǵdaıy aýyr

ORAL. QazAqparat – Batys Qazaqstan oblysyndaǵy ınfektsııalyq statsıonarda koronavırýstan emdelip jatqan bir adam ǵana qaldy, dep habarlaıdy QazAqparat tilshisi.

BQO densaýlyq saqtaý basqarmasy málim etkendeı, 200 tósektik modýldik aýrýhanada jatqan naýqastyń jaǵdaıy aýyr. Ol jansaqtaý bóliminde, jasandy tynys alý apparatyna qosylǵan.

Oblys boıynsha pandemııa bastalǵannan beri 49654, sonyń ishinde bıyl 9584 adamnan indet tabyldy. Al, sońǵy táýlikte koronavırýs juqtyrǵan adam tirkelgen joq.

Basqarmadan túsken málimetke qaraǵanda, óńirde 275616 adam vaktsına saldyrdy. Bul – jospardyń 66,5 paıyzy. Sonyń 265687-si (64,1 paıyz) ekinshi komponentpen egildi.

Oblys boıynsha 74911 adam revaktsınatsııadan ótti. Pfizer vaktsınasyn 11162 adam alsa, onyń 422-si – júkti áıel, 4951-i – bala emizetin ana, 5774-i – jasóspirim, 15-i – múgedektigi bar turǵyn.

Eske sala keteıik, budan buryn Batys Qazaqstanda 73 myńnan astam adamnyń revaktsınatsııadan ótkenin jazǵan bolatynbyz.