BQO saılaýshylary daýys berýge otbasymen kelip jatyr

ORAL. QazAqparat – Batys Qazaqstan oblysynda kezekten tys prezıdent saılaýynda daýys berý qalypty ótip jatyr, dep habarlaıdy QazAqparat tilshisi.

BQO aýmaqtyq saılaý komıssııasynyń tóraǵasy Ǵaısa Qapaqov málim etkenindeı, óńirdegi barlyq 505 saılaý ýchaskesinde daýys berý ýaqtyly bastaldy.

Onyń sózine qaraǵanda, saılaýshylar arasynda alǵashqy ret daýys berýshiler, otbasymen kelip jatqandar bar.

Aıtalyq, Aqjaıyq aýdany ortalyǵy Chapaev aýylynda Aqjaıyq agrarlyq tehnıkalyq kolledjindegi №26 saılaý ýchaskesine Aıtýarovtar otbasy kelip, daýys berdi. Otaǵasy Ǵalym men onyń zaıyby Muhsına zeınetkerler bolsa, bala-kelini Bolat pen Jansaıa ata-anasymen birge turady.

«Bıylǵy prezıdent saılaýynyń mańyzdylyǵy joǵary ekendigin túsinemiz. Sondyqtan otbasymyzben kelip, alǵashqylardyń qatarynda óz tańdaýymyzdy jasadyq», dedi Ǵalym Aıtýarov.

Oral qalasyndaǵy H.Dospanova atyndaǵy №30 mektepte ornalasqan №435 saılaý ýchaskesinde saılaýshylar tańnan kelip, daýys berip jatyr.

Ýchaskelik saılaý komıssııasynyń tóraıymy Gúlshat Bısenǵalıevanyń aıtýynsha, munda barlyǵy 2964 saılaýshy tirkelgen.

«Saılaýshylar belsendiligi jaqsy. Ásirese, jasy bıyl 18-ge tolǵan Dıana Eresh erte kelip, óz daýsyn berdi. Oǵan shaǵyn syılyǵymyzdy tabys ettik. Sondaı-aq zeınetkerler Jańyl Toqmambetova, Nursulý Seıfýllınalar birinshi bolyp óz tańdaýlaryn jasady. Úsh baıqaýshy daýys berý barysyn qadaǵalaýda. Saılaý ýchaskesi boıynsha 64 alǵashqy daýys berýshi bolsa, 28 adam úılerinen daýys berýge ótinish berdi», dedi QazAqparat tilshisine Gúlshat Aqylbekqyzy.

Eske sala keteıik, budan buryn Batys Qazaqstan oblysynda 443 myńǵa jýyq saılaýshy tirkelgenin jazǵan bolatynbyz.