BQO ózenderindegi sý qoımalary qysqy kezeńge kóshirildi

<p>ORAL. KAZINFORM &ndash; Batys Qazaqstan oblysynda sýarý maýsymy aıaqtalǵannan keıin kelesi sý tasqynyn ótkizýge daıyndyq úshin paıdalaný erejelerine sáıkes ózenderdegi sý qoımalary qysqy jumys rejımine aýystyryldy.</p>

«Qazsýshar» RMK Batys Qazaqstan fılıaly dırektorynyń mindetin atqarýshy Raýan Husaıynovtyń óńirlik kommýnıkatsııalar qyzmeti alańynda ótken brıfıngte málim etkenindeı, Oral qalasyndaǵy Shaǵan sý qoımasy qashyrtqy ımaratynyń barlyq shandorlary kezeń-kezeńmen kóterilip, joǵary bekitildi.

Raýan Erlanulynyń sózine qaraǵanda, sonymen qatar sý tasqynyn apatsyz ótkizýge daıyndaý maqsatynda Sholaqańqaty, Embýlatovka, Sulýsaı ózenderindegi sý qoımalary qysqy jumys rejımine kóshirildi. 

«Sý resýrstaryn tasymaldaý kezindegi shyǵyndardy azaıtý, sýdy utymdy ári tıimdi paıdalaný, nysandardy qalypty ustaý maqsatynda jyl saıyn fılıaldyń óz kúshimen mehanıkalandyrylǵan tazartý jáne aǵymdaǵy jóndeý jumystary júrgiziledi. Bıyl uzyndyǵy 73,6 km kanaldardy iriktep mehanıkalandyrylǵan tazartý jáne 8 nysanda aǵymdaǵy jóndeý jumystary aıaqtaldy. Kóktemgi sý tasqynynan keıin 6 nysan qalpyna keltirildi. Osyndaı jumystar jalǵasýda», dedi R.Husaıynov.

Fılıal basshysynyń aıtýynsha, óńirde Kırov sý qoımasyn qaıta jańǵyrtý, Shaǵan ózeni tarmaǵy men Kóshim magıstraldyq kanalyn mehanıkalandyrylǵan tazartý boıynsha jobalar júzege asyrylýda. Sondaı-aq Jaıyq-Kóshim júıesi sý qoımalarynyń kaskadyn, Jánibek sýlandyrý-sýarmalaý júıesin jáne 7 magıstraldyq kanaldy qaıta jańǵyrtý boıynsha jobalyq-smetalyq qujattama ázirlenýde.

Tasqyn sýlardy jınaqtaý maqsatynda Kaztalov aýdany Jalpaqtal aýylynda kólemi 28 mln tekshe metr sý qoımasyn salý úshin qazirgi tańda jobalaý-smetalyq qujattama memlekettik saraptamadan ótkizilýde. Al osy aýdannyń Seksenbaı aýylynda josparlanǵan 10 mln tekshe metr sý qoımasynyń tehnıkalyq-ekonomıkalyq negizdemesi daıyndalýda.

Budan bólek qaıta jańǵyrtý jumystaryn júrgizý úshin daıyn jobalyq-smetalyq qujattamasymen Jaıyqbaı sýlandyrý kanaly kommýnaldyqtan respýblıkalyq menshikke berildi.

R.Husaıynov bıylǵy sý tasqyny kezinde fılıaldyń sý sharýashylyǵy júıeleri boıynsha 1,087 mlrd tekshe metr sý alynyp, nátıjesinde kóldete sýarylatyn 146 myń ga jerlerge sý shyǵarylǵanyn jetkizdi. 

«Oblysta aýyl sharýashylyǵy taýaryn óndirýshilerge sýarmaly sý tolyq kólemde berildi. Toǵyz aıdyń qorytyndysy boıynsha kórsetilgen qyzmetter kólemi sý berýdiń aldyn ala josparyna sáıkes keledi. Jyldyq jospar 20,6 mln tekshe metr bolsa, qazirdiń ózinde 99,1 paıyzǵa (20,4 mln tekshe metr) oryndalyp otyr. Sondaı-aq tehnıkalyq maqsattarǵa 0,25 mln tekshe metr (jyldyq jospar – 0,27 mln tekshe metr) sý berildi. Kúni búgin kúzgi-qysqy kezeńde Jánibek, Bókeı ordasy, Báıterek, Tasqala, Aqjaıyq, Kaztalov, Jańaqala aýdandarynyń eldi mekenderinde qolaıly sanıtarlyq-ekologııalyq jaǵdaıdy ustaý jáne mal sýatyn uıymdastyrý úshin sý berilýde. Osy kezge deıin sanıtarlyq-ekologııalyq maqsattarǵa 90,0 mln tekshe metr sý jiberildi. Bul da jyl qorytyndysy boıynsha tolyq oryndalmaqshy», dedi R.Husaıynov.

Eske sala keteıik, budan buryn Batys Qazaqstan oblysynda jańadan sý qoımalary qashan salynatynyn jazǵan edik.