BQO: Oblys ákimi ınvestıtsııa az tartylǵan qala, aýdan basshylaryn synǵa aldy
Batys Qazaqstan oblysy kásipkerlik basqarmasynyń málimetine sáıkes, óńirge ınvestıtsııalar tartý aıasynda ótken jyly 45 joba iske qosylǵan. Osynyń aıasynda 1 myń jańa jumys orny ashylǵan. Jalpy alǵanda 2023 jyldyń qorytyndysy boıynsha negizgi kapıtalǵa salynǵan ınvestıtsııalar kólemi 16,4%-ǵa ósip 645,6 mlrd teńgeni quraǵan. Onyń basym bóligi Qarashyǵanaq ken orny arqyly tartylǵan ınvestıtsııalar.
Al, oblysqa qarasty qalalar men aýdandar, basqarmalar tarapynan ınvestıtsııa tartý baǵytyndaǵy jumys baıaý júrgizilýde. Máselen, aýdandardyń jartysynan kóbi jalpy quny 1 mlrd. teńgege jetpeıtin ınvestjobalar usynsa, onyń ishinde Bókeı ordasy, Qaratóbe, Qaztalov, Shyńǵyrlaý aýdandary usynǵan jobalardyń jalpy quny tómen deńgeıde (205 mln. teńgeden tómen).
Oblys ákimi Narıman Tóreǵalıev ınvestıtsııa tartý jumystarynyń mańyzdylyǵyn aıta kele, bul baǵyttaǵy jumystardy kúsheıtýdi tapsyrdy.
«Memleket basshysy Qasym-Jomart Kemeluly Toqaev elimizdiń myqty ónerkásiptik negizin qalyptastyrý jáne ár óńirde tıimdi ınvestıtsııalyq jobalardy iske asyrýdy tapsyrǵan bolatyn.
Sondyqtan, oblys ekonomıkasyn odan ári ártaraptandyrý, sonyń ishinde ınvestıtsııa tartý baǵytynda naqty isterdi qolǵa alýymyz qajet», - dedi Narıman Tóreǵalıev.
Oral qalasy oblys ortalyǵy bolǵanyna qaramastan 2023 jyldyń qorytyndysy boıynsha negizgi kapıtalǵa salynǵan jeke ınvestıtsııalar kólemi 6,8%-ǵa (83 mlrd.tg) tómendegen. Sondaı-aq, birqatar aýdandarda da kórsetkishter kóńilden shyqpaıdy.
Oblys basshysy ár aýdan ákiminiń, ár basqarma basshynyń jumysy tikeleı ınvestıtsııa tartýmen baılanysty bolýy kerek ekenin eskertti.
«Investıtsııa tartý boıynsha jumys júrgizbeseńder oryndaryńdy bosatasyńdar. Men kadrlyq sheshim qabyldaıtyn bolamyn. Naqty jobalar kerek. Nátıje kerek», - dep atap ótti aımaq basshysy.