BQO-nyń kıeli Bókeı ordasy aýdanyna ushaq qatynaıtyn bolady

ORAL. QazAqparat - Bókeı ordasy tarıhı-mýzeılik kesheni Qazaqstannyń 100 kıeli nysanynyń tizimine engizilgeni belgili. Osyǵan oraı Bókeı ordasy aýdanynda áýe qatynasyn jolǵa qoıý oılastyrylýda. Bul týraly búgin óńirlik kommýnıkatsııalar qyzmetinde ótken brıfıngte aýdan ákimi Nurlan Rahymjanov málim etti, dep habarlaıdy «QazAqparat» tilshisi.

Onyń aıtýynsha, keshenniń atalmysh tizimge engizilýi bókeıordalyqtar úshin zor maqtanysh bolýmen birge úlken jaýapkershilik júkteıdi. Shalǵaıdaǵy Bókeı ordasymen jol qatynasy nashar bolǵandyqtan, aýdanǵa shaǵyn avıatsııa ákelý máselesi qarastyrylýda. Kúni búgin ushaq qonatyn áýejaıǵa laıyq jer izdestirilýde. Sonymen qatar Han ordasy aýylynda týrısterge arnalǵan oıyn-saýyq oryndary da salynatyn bolady. Mundaǵy mýzeıge jyl saıyn úsh myńdaı týrıst keledi. Sonyń ishinde Reseıdiń kórshiles oblystarynan da at basyn tireıtinder az emes.

Aýdan ákimi sondaı-aq qazaqtyń qaharman qyzy, Keńes Odaǵynyń Batyry Mánshúk Mámetovanyń buryn Oral qalasynda turǵan eskertkishi týǵan jeri Orda topyraǵyna jetkizilgendigin, eskertkishtiń ashylý rásimi batyrdyń 95 jyldyq mereıtoıyna oraı, ıaǵnı 2 qazanda ótetindigin habarlady.