BQO-nyń Qaztalov aýdany aýyldaryn sýmen qamtýǵa 817 mln. teńge bólinip otyr
Aýdan ákimi Nurlan Bekqaıyrdyń aıtýynsha, 2017 jyly Qaztalov, Jalpaqtal aýyldarynyń sý qubyryn qaıta qurý jumystaryn aıaqtaýǵa 349 mln. teńge, sondaı-aq Taldyapan, Saryqudyq, Qaıshaqudyq, Qosoba, Aqpáter, Bostandyq, Jańajol, Qaıyńdy aýyldaryndaǵy sý qubyry jelilerin bastap ketýge respýblıkalyq jáne oblystyq bıýdjetten 468 mln. teńge qaraldy.
Ótken jyly oblys boıynsha tórt aýdanǵa «Aqbulaq» baǵdarlamasy boıynsha 379 mln. teńge bólinse, sonyń 322 mln. teńgesi nemese 85 paıyzy Qaztalovqa bólindi. 2016 jyly Nursaı aýylyn sýmen jabdyqtaý nysanyn 250 mln. teńgege «Qurylysgaz» JShS úsh aı merzimde salyp bitirse, aýdan ortalyǵy Qaztalovty sýmen jabdyqtaý júıesin qaıta qurýdy «Batysgazstroı» JShS júrgizýde. Buǵan qaralǵan 241,2 mln. astam teńgeniń ótken jyly 62 mln. teńgesi ıgerildi.
«Oblys ákimi Altaı Kólginovtiń qoldaýymen aýdanymyzdaǵy ózekti máseleniń biri osylaısha sheshilýde. Basqa da kezek kútip turǵan túıtkildi jaıttar barshylyq. Olardyń bári erteń aýyldyq okrýgterde bastalyp, 3 aqpan kúni aýdan ortalyǵynda márege jetetin ákimderdiń turǵyndarmen eseptik kezdesýlerinde naqtylanyp, múmkindigine qaraı sheshimin tabatyn bolady», dedi «QazAqparat» tilshisine Nurlan Maǵazuly.
Eske sala keteıik, BQO-da bıyl elýge jýyq eldi mekendi ortalyqtandyrylǵan aýyz sýmen qamtý úshin 5,7 mlrd. teńge qarastyrylyp otyr. Jalpy, óńirde 443 eldi meken bolsa, osy kezge deıin sonyń 36 paıyzy ǵana aýyz sýmen qamtylǵan.