BQO-nyń birqatar aýdandarynda dinı-aqparattyq jumystar nashar júrgizilýde
Jıynda oblystyq din isteri basqarmasynyń basshysy Talǵat Nyǵmetovtiń málim etkenindeı, turǵyndar arasynda teris dinı aǵymdarǵa qarsy ımmýnıtet qalyptastyrýmen basqarma janyndaǵy din máselelerin zertteý ortalyǵy, aqparattyq-túsindirý toptary, úkimettik emes uıymdar aınalysýda. Oblysta 213 adamdy qamtyǵan 14 aqparattyq-túsindirý toptary jumys jasaıdy. Bıyl jyl basynan beri 102070 adamdy (sonyń 18747-si - jastar) qamtyǵan 1382 shara (461-i jastarǵa qatysty) ótkizildi. 2017 jyly memlekettik áleýmettik tapsyrys aıasynda din salasyndaǵy memlekettik saıasatty júzege asyrý boıynsha 47,8 mln teńgege bir joba júzege asyrylmaqshy. Jobaǵa sáıkes 51 myń turǵyndy qamtıtyn 30-dan astam aýqymdy shara ótkizý kózdelýde.
Túrli formattaǵy sharalardy ótkizýde Jánibek, Tasqala, Shyńǵyrlaý, Bókeı ordasy aýdandarynda belsendilik tómen. Sol sekildi aqparattyq-túsindirý toptarynyń jumysyn baǵalaý boıynsha júrgizilgen zertteý jumysy nátıjesinde Jańaqala (28 paıyz), Terekti (27,5 paıyz), Jánibek pen Bókeı ordasy (25 paıyzdan) aýdandary tómen kórsetkishter kórsetip otyr. Onyń ústine Bókeı ordasy, Jańaqala, Shyńǵyrlaý jáne Qaztalov aýdanynda din máselesimen aınalysatyn arnaıy úkimettik emes uıym múldem qurylmaǵan. Ǵalamtorda jarııalanatyn materıaldar sany jóninen Shyńǵyrlaý, Tasqala, Bókeı ordasy aýdandary artta keledi.
«Elbasymyz «Bolashaqqa baǵdar: rýhanı jańǵyrý» atty baǵdarlamalyq maqalasynda rýhanı jańǵyrý baǵytynda aýqymdy mindetterdi alǵa qoıǵany belgili. Sondyqtan aqparattyq-túsindirý toptarynyń jumysyn da shıratýǵa týra keledi. Ádette mundaı toptar aýdandarǵa barǵanda, únemi belgili bir aýdıtorııamen jumys jasaıdy. Qandaı jıyn bolsyn, sol adamdar otyrady. Áńgime naqty aıtylýy tıisti ortaǵa nege barmaıdy ondaı toptar? Teris aǵymdarǵa jol bermeý úshin barlyq aýyldar qamtylýy kerek. Buǵan teolog, psıhologtarmen birge din, qoǵamdyq uıymdar ókilderi belsene aralasyp, súbeli úles qosýy tıis», - dedi Arman Óteǵulov.
Jıynda sóz alǵan oblystyq bilim basqarmasynyń basshysy Aıgúl Myńbaevanyń aıtýynsha, jalpy bilim beretin mektepterde zaman talabyna saı jasóspirimderdiń dinı saýattylyǵyn arttyrý baǵytynda «Dintaný negizderi» kýrsy 1 saǵat aptalyq júktemesimen engizilse, 2016-2017 oqý jylynda fakýltatıvtik kýrs ataýy «Zaıyrlylyq jáne dintaný negizderi» bolyp ózgertildi. Oblysta bul kýrspen 310 jalpy orta jáne negizgi bilim berý uıymdarynda 5367 oqýshy qamtylyp, barlyǵy 343 muǵalim sabaq beredi. Óńirdegi bilim berý uıymdaryn kúzetpen, qazirgi zamanǵy qaýip dabyly jáne beınebaqylaý júıelerimen qamtamasyz etý baǵytynda naqty jumys atqarylýda. Qazirgi kezde 642 bilim berý mekemesinde 5066 beınekamera ornatylǵan. Bul maqsatqa oblystyq bıýdjetten ótken jyly 233879 myń teńge bólindi. Bıyl Zelenov aýdany Darııan aýylyndaǵy qazaq jáne orys mektepterinde beınebaqylaý kameralaryn ornatý úshin 400 myń teńge qaraldy. 2017 jyldyń aqpan aıynda Logitex JShS pılottyq joba retinde daryndy balalarǵa arnalǵan mamandandyrylǵan S.Seıfýllın atyndaǵy №11 oblystyq qazaq mektep-ınternat keshenine 4 týrnıket ornatty. Sonymen qatar atalǵan mektepke qosymsha beınebaqylaý kameralaryn ornatý úshin 5 mln teńgeni bólý oılastyrylýda.
Bilim berý bólimderiniń málimetteri boıynsha mindetti mektep formasyn saqtamaı, 118-i oramal taǵyp, altaýy hıdjabpen kelip otyrǵan oqýshylar bar. Bul baǵytta dástúrli emes dinı baǵytty ustanatyn ata-analarmen túsindirý jumystary júrgizilip keledi. «Degenmen oqýshylardyń dinı saýattylyǵyn arttyrý maqsatynda ata-analarmen jumysty shıratýmen birge «Zaıyrlylyq jáne dintaný negizderi» pánin 9-synyptan emes, 7-8-synyptan bastap qolǵa alý kerek. Sonda onyń tıimdiligi, balalardyń qabyldaýy artady. Oblystyq din basqarmasymen birlese otyryp, atalmysh pán muǵalimderiniń biliktiligin kóterý, sońǵy tájirıbelik aqparattarmen qamtamasyz etý qajet. Sondaı-aq dinı ekstremızm men terrorızmniń aldyn alý baǵytyndaǵy aqparattyq-túsindirý jumystaryna mektep psıhologtary qatystyrylsa, durys bolar edi. Oqýshylar arasynda ulttyq qundylyqtardy nasıhattap, jastardy otanshyldyq pen dinı taǵattylyqqa shaqyrý isi de báseńdemeýi kerek», - dedi A.Myńbaeva.
Otyrys sońynda talqylanǵan másele boıynsha basqa da usynys-pikirler aıtylyp, tıisti hattama qabyldandy.
Aıta keteıik, bıyl jyl basynan beri dinı qarym-qatynastar salasynda oblys boıynsha 20 zańbuzýshylyq deregi tirkelgen.