BQO-nyń 2018 jylǵa arnalǵan bıýdjeti bekitildi
BQO ekonomıka jáne bıýdjettik josparlaý basqarmasynyń basshysy Qaısar Mańqaraevtyń oblystyq máslıhattyń 2018-2020 jyldarǵa arnalǵan óńir bıýdjetiniń jobasy maquldanǵan kezekten tys 15-sessııasynda málim etkenindeı, aldaǵy jyly óz kirisi esebinen qazynaǵa 28,7 mlrd teńge quıylmaqshy.
Sondaı-aq 50,9 mlrd teńge jalpy sıpattaǵy transfertter (sýbventsııalar), 23,1 mlrd teńge respýblıkalyq bıýdjetten maqsatty transfertter men nesıeler, 3,2 mlrd teńge basqa túsimder esebinde túspekshi. Sonymen qatar túsimder men shyǵystar boıynsha 2019 jylǵy oblys bıýdjeti 83,4 mlrd jáne 2020 jylǵa 92,9 mlrd teńge kóleminde belgilendi.
Áleýmettik qoldaý, densaýlyq jáne bilim, halyqtyń ómir súrý deńgeıin jaqsartý oblystyq bıýdjettiń negizgi baǵyttary bolyp tabylady.
Bıýdjette aldaǵy jyly aýyl sharýashylyǵyn qoldaýǵa 8,2 mlrd teńge, kásipkerlik qyzmetti -2,5 mlrd teńge, kóliktik ınfraqurylymdy damytýǵa -6,9 mlrd teńge (sonyń ishinde respýblıkalyq bıýdjetten keletin transfertter esebinen 3 mlrd teńge), 4,3 mlrd teńge bastalǵan jobalardy jalǵastyrý men aıaqtaýǵa qaraldy.
Oblys aýyldaryn sapaly aýyz sýmen qamtý jumysy jalǵasady. Mysaly, respýblıkalyq bıýdjetten 13 nysanǵa 2,3 mlrd teńge bólinbekshi, sonyń ishinde beseýi bıyldan aýysatyn, al 9 eldi mekendi qamtıtyn 8-i - jańa jobalar.
Bókeı ordasy jáne Jánibek aýdandaryndaǵy 12 eldi mekendi gazdandyrý jumystaryn jalǵastyrýǵa 1,4 mlrd teńge jumsalmaq.
Oǵan qosa «Agrobıznes - 2020» baǵdarlamasy aıasynda oblystyń aýyl sharýashylyǵy salasyna 3,2 mlrd teńge qaraldy.
Sessııada sondaı-aq respýblıkalyq bıýdjetten bólingen maqsatty transfertter esebinen 2017 jylǵy bıýdjet 3,3 mlrd teńgege naqtylandy. Munda 1 mlrd teńge áleýmettik sala men osy saladaǵy nysandardy damytýǵa, 1,8 mlrd teńge aýyl sharýashylyǵy, veterınarııa, qorshaǵan ortany qorǵaýǵa jáne basqa maqsattarǵa qarastyryldy. Osylaısha, bıylǵy bıýdjet kirister men shyǵystar boıynsha 145,2 mlrd teńgege jetti.
Jıynǵa qatysqan oblys ákimi Altaı Kólginov Elbasy tapsyrmasyna sáıkes ár salaǵa qarjy jetkilikti mólsherde bólinip otyrǵanyn, sondyqtan ony maqsatty túrde, ornymen ıgerý qajettigin atap kórsetti.