BQO-nyń úsh aýdanynda saılaýshylar daýys berip jatyr

<p>Batys Qazaqstan oblysynyń Bókeı ordasy, Qaratóbe jáne Tasqala aýdandarynda saılaýshylar daýys berýde, dep habarlaıdy <a href="Kazinform" target="_blank" rel="noopener">Kazinform</a>.</p>

BQO aýmaqtyq saılaý komıssııasynan túsken málimetke qaraǵanda, úsh aýdanda 28 884 saılaýshy bar.

Saıası naýqanǵa quramynda 378 múshesi bar 1 oblystyq aýmaqtyq, 3 aýdandyq aýmaqtyq, 63 ýchaskelik saılaý komıssııalary jumyldyryldy.

Úsh aýdannyń árqaısysynda aýdan ákimi laýazymyna 3 kandıdattan tirkelgen.

Bókeı ordasy aýdanynda tańǵy saǵat 7.00-de 22 saılaý ýchaskesi óz jumysyn bastady.

Memlekettik Gımn oryndalǵannan keıin ýchaskelik saılaý komıssııalarynyń tóraǵalary sóz alyp, óz mindetterimen, komıssııa múshelerimen tanystyryp, eleń-alańnan mańyzdy saılaýǵa jaýapkershilik tanytyp kelgen aýyl turǵyndaryna rızashylyǵyn bildirdi.

Aýdan ortalyǵy Saıqyn aýylyndaǵy N53 saılaý ýchaskesinde komıssııa tóraǵasy Qýanysh Elemesov aýyl turǵyndaryn memleket úshin mańyzdy saılaýǵa belsendilikpen qatysýǵa, el taǵdyryna beıjaı qaramaı, azamattyq tanytýǵa shaqyrdy. Odan keıin sóz alǵan ardager-ustaz Sársenbaı Qýanyshalıev: "Jańa Qazaqstan" ózdiginen jasala salmaıdy, memleket bolashaǵyna meılinshe janashyr azamattardyń jaýapkershiligi men sanaly belsendiliginen bastaý alady», dedi. Kámelettik jasqa tolyp, alǵash daýys bergeli turǵan Alına Temirǵalıeva qatarlastaryn qalys qalmaýǵa úndedi.

Azamattyq belsendiligimen úlgi kórsetken aǵa býyn ókilderine, alǵash ret saılaýǵa qatysyp, óz tańdaýyn jasaǵan Alınaǵa estelik syılyq berildi.

Aýdan boıynsha saılaýshylar tizimi jasaqtalyp, 9 141 saılaýshy tirkelgen. Saılaý ýchaskeleriniń barlyǵy kerekti qural-jabdyqtarmen, ınternet jelisimen qamtylǵan. Saıqynda №53, Bısende №65, Han ordasynda №60 saılaý ýchaskesinde onlaın-servıs qarastyrylǵan.

Múmkindigi shekteýli 366 saılaýshyǵa arnaıy kabınalar jasaqtaldy. Barlyq ýchaskelerde ataýlar braıl qarpimen jazylyp, daktıldi jolaq, shaqyrý qońyraýlary ornatyldy.

Bókeı ordasyndaǵy saıılaýshylardyń eń úlkeni 97 jasta, al 107 saılaýshy alǵash ret daýys bermekshi.

Oblystaǵy Qaratóbe, Tasqala aýdandarynda da saılaý qalypty ótip jatyr.

Eske sala keteıik, budan buryn Batys Qazaqstanda úsh aýdanda 28 myńnan astam saılaýshy tirkelgenin jazǵan bolatynbyz.