BQO-nyń Kaztalov aýdanynda ózen tasydy, 22 aýyldy sý basýy múmkin
BQO TJ departamentiniń baspasóz qyzmetinen málim etkendeı, Qaraózen men Saryózende sý deńgeıiniń kóterilýine baılanysty barlyǵy 22 aýylǵa qaýip tónip tur.
«Qazirgi ýaqytta Qaraózenge Reseıdiń Saratov oblysyndaǵy Orel-Gaı sý qoımasynan sekýndyna 408 tekshe metr, Dmıtrıevten 325 tekshe metr, Prıýzennen 372 tekshe metr sý jiberilýde. Atalǵan sý qoımalarynan aqqan sý Kaztalov aýdany aýmaǵymen ótedi. Sol sekildi Varfolomeev sý qoımasy 105,6 paıyzǵa tolǵan. Budan Saryózenge sekýndyna 100 tekshe metr sý bosatylýda. Ózen boıynda 2500 qap tóselip, jaǵalaýdy bekitý, sýdy jaıylmalarǵa aǵyzý jumystary júrgizilýde. № 1 Kaztalov sý qoımasyna shlıýz ashyldy. Sý deńgeıi kúrt kóterilgen jaǵdaıda № 2 Kaztalov jáne Mamaı sý qoımalarynyń shlıýzderi ashylady. Kúni búgin ár eldi mekende táýlik boıy kezekshilik uıymdastyryldy. Aýdan boıynsha 3080 adamǵa arnalǵan 37 evakýatsııalyq qosyn ázirlendi» dep habarlady vedomstvodan.
«Qazgıdromet» RMK BQO fılıalynyń málimeti boıynsha Qaraózenniń Jalpaqtal aýyly tusyndaǵy deńgeıi 741 santımetrge (qaýipti shegi — 790-820 sm) jetti.
Sondaı-aq Saryózenniń deńgeıi Qoshankól aýyly tusynda — 750 (1200-1300), Bostandyqta 400 (600 sm) santımetrdi kórsetti.
Óńirde Shaǵan, Derkól jáne Jaıyq ózenderi de kóterilý ústinde.
Kaztalov aýdany ákimdiginiń baspasóz qyzmetinen túsken málimetke qaraǵanda, búgin aýdan ákimi Aslanbek Sarqulov sý tasqynynyń aldyn alý sharalaryna baılanysty jedel shtab otyrysyn ótkizdi.
Jıynda sý basý qaýpi bar aýyldar men eldi mekenderge aýyr tehnıka men jumys kúshi jumyldyrylǵany aıtylyp, basqa da máseleler pysyqtalyp, tıisti tapsyrmalar berildi.
«Iá, eki ózennen de sý kelip jatyr. Barlyq qaýipsizdik sharalary jasalyp jatyr» dedi Kazinform tilshisine A.Sarqulov.
Eske sala keteıik, budan buryn Oral qalasynda saıajaı turǵyndaryn kóshirý bastalǵanyn jazǵan bolatynbyz.