BQO-nyń Bórli aýdanynda sý tasqynynan zardap shekkender úshin 60 úı salynyp jatyr
Qazirgi ýaqytta Aqsý aýylynda – 23, Pýgachevte – 12, Araltalda – 14, Keńtúbekte 11 úı boı kóterýde. Bulardyń basym bóliginde qurylys jumystary 60 paıyzǵa aıaqtalǵan.
Aýdandaǵy atalmysh turǵyn úılerdiń qurylysymen tanysqan oblys ákimi Narıman Tóreǵalıev aýdan ákimdigine, oblystyq qurylys basqarmasyna jáne merdigerlerge birqatar tapsyrma berdi.
«Memleket basshysynyń tapsyrmasyna sáıkes, qurylys jumystaryn josparǵa saı bitirýimiz kerek. Bórli aýdanynda birneshe aýyldy aralap shyqtym. Jumys qarqyny jaqsy. Keıbir úılerdiń qurylysyna qosymsha taǵy da qurylysshylardy tartý qajettiligin eskerttim», - dedi N.Tóreǵalıev.
Bórli aýdanynyń ákimi Erkebulan Ihsanovtyń Kazinform tilshisine málim etkenindeı, Araltal men Pýgachevta 26 úı jańa jerlerge salynyp jatyr. Aqsý men Keńtúbekte 34 baspana jaramsyz dep tanylǵan, irgetasy bolmaǵan úılerdiń ornynda boı kóterýde. Mundaǵy bir erekshelik, irgetasy naqty jer betinen 80 santımetr bıikte tur.
«Aqsý men Keńtúbektegi úılerdiń qurylysyn jergilikti «Aqsaıgazservıs» kompanııasy, Araltal men Pýgachevtaǵy baspanalardy almatylyq «QAZAQSTROY» JShS qarjylandyrýda. Al turǵyn úı qurylystaryn Bórli aýdanynda tirkelgen «Naýryz», «Dokastroıkom», «Ýralskstroıınvest» JShS júrgizýde», - dedi E.Ihsanov.
Aýdan basshysy sonymen qatar baspanasy turýǵa jaramsyz bolyp qalǵan turǵyndar úshin "QPO b.v." kompanııasynyń qarjysyna 64 úıdiń satyp alynǵanyn jetkizdi.
«Úılerdi turǵyndardyń ózderi tańdady, baǵalady. Aýdan ákimdigi, «QPO b.v.», satýshy jáne satyp alýshy arasynda tórtjaqty kelisimshart jasaldy. Qujattar ádilet organdarynda tirkeýden ótkizildi», - dedi E.Ihsanov.
Eske sala keteıik, budan buryn Oral qalasynda baspanasy sýǵa ketken turǵyndar úshin 450 jeke úı salynatynyn jazǵan bolatynbyz.