BQO men Qyzylordanyń oqýshylary Aqmoladaǵy kıeli jerlerge saıahat jasady
Elimiz boıynsha tuńǵysh ret qolǵa alynyp otyrǵan aktsııa sheńberinde Qyzylorda jáne Batys Qazaqstan oblystarynyń mektep oqýshylary Aqmola oblysynyń kıeli jerlerine saıahat jasady. Aktsııanyń alǵashqy kúni balalar Býrabaı baýraıyndaǵy buǵy ósirý sharýashylyǵy aýmaǵynda jaqynda ashylǵan kóne dəýirdiń kózindeı kórikti «Jaılaý» etnoaýylynda boldy. Onda balalar qaz-qatar tigilgen qazaqtyń aqshańqan kıiz úılerine kirip, ulttyq taǵamynan dám tatyp, halyq ánderin tyńdap, altybaqan teýip, atqa minip serýendedi.
Al, kelesi kúnderi áleýmettik jaǵynan az qamtylǵan otbasylarynyń balalarynan quralǵan 134 oqýshy men olardyń jetekshileri toptarǵa bólinip, Abylaı han alańy men murajaıy, «Han taǵyn» tárizdi Aqmola óńiriniń kıeli jerlerin aralap, mádenı qundylyqtarymen tanysty. Maǵjan Jumabaev atyndaǵy oblystyq ǵylymı-ámbebap kitaphanasynda bolǵanynda onyń tarıhyn, kitap qoryn, kitaphanadaǵy oqyrmandarǵa qyzmet kórsetý bólimderin, «Rýhanı jańǵyrý» zalyn, «Mobıldik kitaphana», «Kovorkıng» ortalyǵy, Maǵjan Jumabaevtyń 125 jyldyq mereıtoıyna arnalǵan «Maǵjan aqyn» buryshy tanystyrylyp, shyǵarmashylyq alańdarda tanymdyq-ıntellektýaldyq saǵat ótkizildi. Sonymen qatar, kitaphanadaǵy ınnovatsııalyq jobalar týraly, Rýhanı jańǵyrý baǵdarlamasy aıasyndaǵy mańyzdy qadamdar jaıly málimetter berildi.
Sonaý Syr óńiri men Batys Qazaqstan oblysynan at basyn burǵan balalarǵa kitaphananyń zamanaýı kelbeti, oqyrmandarǵa qyzmet kórsetýi kóńilderinen shyǵyp, kitaphanashylarǵa jyly qarsy alǵandary úshin alǵystaryn bildirdi. Kitaphana boıynsha ekskýrsııa jasaǵan «Kópshilik is-sharalar jáne qoǵammen baılanys» bóliminiń qyzmetkerleri Nazıra Ramazanova men Aınash Erýbaeva balalarmen qyzyqty suhbat júrgizip, ólkeniń tarıhy betterinen syr shertip, erkin pikir almasty. Balalar Kovorkıng ortalyǵynda jaıly, qolaıly alańda alǵan áserlerimen bólisti.
«Maǵan bul jolǵy kıeli jerlerge saıahat qatty unady. Osyndaı múmkindik bergen jandarǵa alǵysym sheksiz», dedi qyzylordalyq oqýshy Zarına Nálibaeva.
Aqmola oblystyq bilim basqarmasy basshysynyń orynbasary Botagóz Dúısenovanyń aıtýynsha, aldaǵy tamyz aıynda aqmolalyq 70 oqýshy Qyzylorda oblysy men Astana qalasyna sapar shegedi.
Eske sala keteıik, bıylǵy jyldyń 10 tamyzynan bastap, «Rýhanı» jańǵyrý» baǵdarlamasynyń «Týǵan jer» jobasy sheńberinde elimizde respýblıkalyq ólketaný aktsııasy qolǵa alyndy. Atalmysh aktsııa sheberinde elimiz boıynsha áleýmettik jaǵynan az qamtylǵan otbasylardaǵy 2 myń bala kıeli jerlerge saıahat jasaıdy.