BQO men Aqmola oblysynyń turǵyny Atyraýda esirtkini tyǵyp satpaq bolǵan
Atyraý oblystyq polıtsııa departamentiniń baspasóz qyzmetinen málim etkendeı, ózge óńirdiń turǵyndary esirtki zattaryn zańsyz saqtaý, tyǵyp satý kúdigine ilingen.
«Esirtki qylmysyna qarsy is-qımyl basqarmasynyń qyzmetkerleri oblys aýmaǵynda esirtki zattaryn saqtaǵan degen kúdikpen Batys Qazaqstan oblysynyń turǵynyn anyqtady. Onyń jaldamaly páterine tintý júrgizý kezinde qara sómkege salynǵan 1 kelige jýyq esirtki tárkilendi. Sot saraptamasynyń qorytyndysyna sáıkes tárkilengen qurǵaq ósimdik gashısh esirtkisi ekeni anyqtaldy. Kúdikti qumar oıyndarmen áýestengen. Sonyń saldarynan qaryzy 8 mln teńgege jýyqtaǵan. Qaryzynan qutylý úshin elimizdiń ońtústik óńirinen esirtki zattaryn tasymaldap, satpaq bolǵan», - dep habarlady departamenttiń baspasóz qyzmeti.
Al, ekinshi kúdikti — Aqmola oblysynyń turǵyny. Ol Atyraýǵa bıyl qańtarda kelgen.
«Kúdiktiniń Atyraýdaǵy ýaqytsha turaqtaǵan meken-jaıyn tekserý kezinde jalpy salmaǵy 175 gramm bolatyn sıntetıkalyq esirtki tárkilendi. Ol sıntetıkalyq esirtkini jasyryn tyǵý ádisimen satý úshin ınternet-dúkenderdiń jarnamasyna senip kelgeni anyqtaldy», - dep málim etti departamenttiń baspasóz qyzmetinen.
Qazir 2 kúdikti ýaqytsha ustaý ızolıatoryna qamaýǵa alyndy. Kúdiktilerge qatysty sotqa deıingi tergeý júrgizý bastaldy.
Eske sala ketelik, buǵan deıin Atyraýda kórshi óńir turǵyndarynan esirtki men tapansha tárkilengenin habarlaǵan edik.