BQO mektepterinde jylytý maýsymyna daıyndyq qalaı júrgizilip jatyr
BQO bilim basqarmasynyń basshysy Eldos Safýllınniń málim etkenindeı, kúni búginge deıin 359 bilim berý uıymynda jylytý júıesiniń qysymyn tekserý jumystary júrgizildi.
Onyń sózine qaraǵanda, 13 kelisimshart jasalyp, 24,2 mlrd tekshe metr gaz jáne 533 tonna qatty otyn satyp alyndy. Sonyń nátıjesinde barlyq mektepte jylýdy ýaqtyly berý josparlanýda.
«Sonymen qatar Jańaqala aýdany boıynsha 3 bilim berý uıymyna japsarlas ornalasqan qazandyqtardy ǵımarattan syrtqa shyǵarý úshin qarajat bólinip, jumystary atqaryldy. Qazirgi tańda qarjyny únemdeý esebinen bilim berý uıymdarynda 12 qazandyq alynyp, ornatyldy. Qosymsha únem esebinen tamyz aıynyń sońyna deıin taǵy 26 qazandyq alý kózdelýde», - dedi E.Safýllın.
Basqarma basshysynyń aıtýynsha, QR Bilim jáne ǵylym mınıstriniń 2020 jylǵy 24 sáýirdegi № 158 buıryǵyna sáıkes shalǵaıdaǵy aýyldyq eldi mekenderde turatyn balalardy jalpy bilim berý uıymdaryna jáne keıin úılerine tegin tasymaldaý uıymdastyrylady. Tıisti bilim berý uıymy joq 71 eldi mekennen 4 969 bala sapaly bilimge qoljetimdilikti qamtamasyz etý úshin 52 mektepke kún saıyn tasymaldanbaqshy.
«Barlyǵy 69 avtokólik oqýshylardy tasymaldaıdy. 69 júrgizýshiniń tıisti kýálikteri bar, tehnıkalyq baqylaýdan ótkizý jumystary júrgiziledi. Oral qalasyndaǵy 4 mekteptiń avtokóligi jańa oqý jylyna deıin tehnıkalyq baqylaýdan ótkiziledi», - deıdi E.Safýllın.
Basqarma málimetinshe, oblysta 10 úsh aýysymdy jáne apatty jaǵdaıdaǵy 16 mektep bar. Bıyl Bórli jáne Kaztalov aýdanynda 2 mekteptiń qurylysy aıaqtalmaqshy.
Atalmysh máseleni sheshý maqsatynda «Jaıly mektep» pılottyq ulttyq joba aıasynda Batys Qazaqstan oblysy boıynsha 2023-2025 jyldar aralyǵynda 16 200 oryndyq 18 mektep salý josparlansa, qazirgi kezle sonyń 9-y boı kóterýde. Mektepter qurylysynyń tapsyrys berýshisi – «Samuryq Qazyna» AQ.
Jańa oqý jylynda Terekti aýdany Podstepnyı aýylynda 1 200 oryndyq, Oral qalasynda 1 500 oryndyq № 60 orta mektep ǵımaraty paıdalanýǵa berilmek.
«Aýyl – el besigi» baǵdarlamasy aıasynda Jańaqala aýdanyndaǵy Karmanov mektep-balabaqsha keshenin «Jaıyq Sıtı» JShS kúrdeli jóndeýden ótkizýde. Bul nysan 5 qyrkúıekte iske qosylmaqshy. Sondaı-aq Aqjaıyq aýdanynda Bazartóbe, Báıterekte Razdolnyı mektebi oblystyq bıýdjet esebinen jóndelip, jańa oqý jylyna deıin tapsyrylmaqshy. Budan bólek «QPO b.v.» kompanııasynyń áleýmettik-ınfraqurylymdyq jobalary esebinen Oral qalasynda daryndy balalarǵa arnalǵan S.Seıfýllın atyndaǵy № 11 oblystyq mamandandyrylǵan mektep-lıtseı-ınternaty (1 176 oryn), D.Nurpeıisova atyndaǵy balalar mýzykalyq mektebi (620 oryn), № 17 (1 204 oryn) jáne № 9 (1 260 oryn) mekteptiń syrty jáne shatyrlary aýystyrylady. Terezeleri jańartylyp, ishi jóndeledi. Búgingi tańda merdigerler anyqtalyp, jumystar bastalyp ketti», - dedi E.Safýllın.
Eske sala keteıik, budan buryn BQO-da eki lıtseıde oqýshylardy konkýrs arqyly qabyldaýǵa qatysty daý týyndaǵanyn jazǵan bolatynbyz.