BQO quramasynyń jattyqtyrýshysy: Qazaqstanda boks óte qatty damyǵan, básekelestik joǵary
-Sattar Amanqosuly, jýyrda ǵana tórtkúl dúnıeniń nazaryn aýdarǵan Tokıo Olımpıadasy márege jetkeni belgili. Osy aıtýly dodadan bokstan Qazaqstan ulttyq quramasy alǵash ret altyn júldesiz qaıtty. Bilikti bapker retinde munyń syry nede dep oılaısyz?
-Iá, osyǵan deıin qazaqstandyq boksshylar altynsyz kelmep edi. Qos qola medal, árıne, az. Osy oraıda eldiń talap qoıýy óte durys. Degenmen myna jaǵdaıdy da eskerýimiz kerek. Qazaqstanda boks óte qatty damyǵan, básekelestik joǵary. Jalpy, álemdi alyp qaraǵanda, mundaı jaıt bolyp turady. Mysaly, Keńes dáýirinen beri shashasyna shań juqpaı, dodanyń aldyn bermegen Kýba boksshylary Beıjiń Olımpıadasynda altynsyz qaldy. Sodan keıin qaıtadan kóterilip, kósh basyna shyqty. ıAǵnı qaı sala bolmasyn ár nárseniń de sharyqtaý shegi bolady, daǵdarys ta bolmaı qalmaıdy. Bul da bir tabıǵı zańdylyq bolar dep oılaımyn.
Qazirgi tańda shet elden mamandar shaqyrtý kerek degen sekildi usynystar aıtylyp jatyr, kinálaý da kóp. Alaıda men Qazaqstan boksshylary men mamandaryna senemin. Namysty jigitterimiz az emes. Mysal kerek pe, aıtaıyn. Elimiz táýelsizdik alǵannan beri úsh birdeı boksshymyz Olımpıadada eń úzdik sportshyǵa beriletin Vel Barker kýbogyna ıe boldy. 1996 jyly Atlantada Vasılıı Jırov, 2004 jyly Afınyda Baqtııar Artaev, 2012 jyly Londonda Serik Sápıev júldeger atandy. Sońǵy otyz jylda boksy qatty damyǵan basqa birde-bir el mundaı tabys-jetistigimen maqtana almaıdy.
-Ótken jyly eresekter arasyndaǵy Qazaqstan birinshiliginde tól shákirtińiz Danııal Sábıt 18 jasynda aıdy aspanǵa shyǵaryp, chempıon atandy. Aq Jaıyq jurtshylyǵy Rıo Olımpıadasynyń chempıony Danııar Eleýsinovtiń ornyn basatyn izbasary keldi dep qýandy. Bıyl ol Azııa chempıonatynda kúmis júldege ıe boldy. Endigi maqsattaryńyz qandaı?
-Danııal Sábıttiń jeke bapkeri retinde aıtarym, basty maqsatymyz – Olımpıada oıyndaryna qatysý. «Aryq aıtyp, semiz shyǵý» kerek qoı, eń bastysy, el senimin aqtaý úshin bar kúshimizdi salamyz.
-Oraldaǵy Danııar Eleýsinov atyndaǵy boks mektebinde qazir qansha bala jattyǵýda, taǵy kimderden úmit kútesiz?
-Bul boks mektebiniń ashylǵanyna tórtinshi jylǵa ketti. Sodan beri jarqyrap, mine, Danııal Sábıt shyqty. Basqa da ósip kele jatqan jasóspirim boksshylar bar. Negizi boks mektebinde 800-ge jýyq bala jattyǵady. Qazir eldi jaılaǵan indetke baılanysty 500-deı jasóspirim kelýde. Degenmen aldaǵy ýaqytta qaıtadan 800-ge jaqyndaıdy dep otyrmyz. Keleshekte oblystyń, eldiń namysyn abyroımen qorǵaıtyn boksshylar qalyptasady dep oılaımyn. Qazirdiń ózinde olardyń arasynda el birinshiliginde, aımaqtyq chempıonattarda oryn alyp, oqý-jattyǵý jıyndaryna qatysyp júrgender bar. Maqsat – jetkinshek boksshylardy 18 jasqa deıin de, odan keıin de baptap, oblys komandasyn jasaqtap, myqtylaryn el quramasyna iliktirý. Qoryta aıtqanda, Danııar men Danııaldyń jolyn qýatyndar bolashaqta da shyǵýy úshin tynbaı eńbektene beretin bolamyz.