BQO-ǵa kıik etin óńdeýge qytaılyq ınvestorlar keletini ras pa

<p>Batys Qazaqstan oblysynyń ákimi Narıman Tóreǵalıev kıik eti men ózge de bólikterin tereń óńdeýıtin zaýyt salýǵa ınvestor tartý jumystary týraly aıtyp berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Oblysta aýyl sharýashylyǵy salasynda, ásirese kıikke qatysty qytaılyq ınvestorlarǵa jer beriledi degen aqparat ras pa?» dep surady astanalyq tilshiler ákimnen. 

«Biz qazir ınvestor izdep jatyrmyz. Qytaı bola ma, basqa bola ma, bizge ınvestor jaqsy shartpen kelse qabyldaımyz. Eki aı buryn Qytaıdan azamattar keldi, óz oıyn aıtty. Jer taýyp berseńizder, kıikterdi qolǵa úıretip, bolashaqta úlken zaýyt salyp, kıik etin óńdeýge, jalpy mal etin óńdeýge qatysty tereń óńdeý jumysyn qamtıtyn jospar baryn aıtty. Biz olarǵa óz shartymyzdy qoıdyq. Jer tapqan jaǵdaıda birinshiden kompanııa bizdiń oblysqa tirkelýi kerek, ıaǵnı salyq bizge túsýi kerek. Jumys isteýge jergilikti halyq alynýy kerek jáne óz moınyna alǵan sharttaryn oryndaýy kerek. Bular oryndalmasa, jerdi keri qaıtarý jóninde aldyn ala ýaǵdalastyq boldy. Eger olar biz aıtqan shartqa kelisse, jumys qolǵa alynady. Onyń qarjy jaǵy da áli sheshilmegen», - dedi N. Tóreǵalıev Astanada ortalyq kommýnıkatsııalar qyzmetinde.

Óz jaýabynda ákim ınvestor tartýdyń óte mańyzdy ekenin aıtty. Bul salyq túsimine jáne halyqty, ásirese jastardy jumyspen qamtýǵa kómegin tıgizedi.

«Taǵy qaıtalap aıtamyn, jer (ınvestorǵa) ýaqytsha beriledi. Sondaı-aq zaýyt salynǵan jaǵdaıda, ol zaýytty kim bolsa da arqalap alyp ketpeıdi ǵoı. Ol kimge paıdaly? Eń sońynda halyqqa paıdaly, elge paıdaly. Biz osyny jaqsy túsinýimiz kerek. Sondyqtan Qytaı keldi eken dep odan qorqýdyń qajeti joq. Eger Qytaıdan ınvestor kelip, osyndaı sharýa isteımin dep jatsa, biz ony qabyldaımyz. Qazir iri qara jáne jáne basqa maldy soıyp jatyrmyz. Onyń terisin qaıda jiberip jatyrmyz? Súıegi qaıda jatyr? Eshqaısysyn óńdeı almaımyz, paıdaǵa asyra almaı otyrmyz. Keshe kelgen ınvestorlarmen sóıleskende «Qany, terisi, sıraǵynan bastap múıizine deıin súıekteri qaıta ketedi? Osynyń bárin óńdeısizder me?» dep suraq qoıdym. Olar bárin óńdeýge daıyn, ıaǵnı sondaı tehnologııa bar. Bizde úlken zaýyttar salynsa, óte paıdaly bolady. Tipti maldyń qanynan mal azyǵyn daıyndaýǵa bolady eken. Súıekti óńdep, un jasap, mal azyǵyna jiberýge bolady. Mine, osy múmkindikterdi nege paıdalanbasqa?!», - deıdi BQO ákimi.

Buǵan deıin BQO ákimi óńirdegi kıik sanyn retteý jumystary qalaı júrip jatqanyn aıtqan edi.