BQO qazaq teatrynyń jańa maýsymy «Tomırıs» tragedııasymen ashyldy
Táýelsizdiktiń 30 jyldyǵyna oraı qoıylymdy belgili rejısser ári akter, Qazaqstannyń eńbek sińirgen ártisi, «Qurmet» ordeniniń ıegeri Murat Ahmanov sahnalady.
Qoıylymnyń sýretshisi Murat Mámbetov, baletmeısteri Qarlyǵash Qadyrbekova bolsa, Tomırısti mádenıet salasynyń úzdigi Horlan Shamelova somdady.
Sondaı-aq Balqashty «Eren eńbegi úshin» medaliniń ıegeri Qýanysh Amandyqov, Spargapısti Aqjol Ihsan, Kırdi Jantileý Nýftýllın, Amagany Juldyz Mamedova alyp shyqty. Eles (ekinshi Tomırıs) bolyp Elmıra Maqasheva kórinse, Mardty Raıymbek Ermek, Ardashırdi mádenıet salasynyń úzdigi Musaǵalı Bektenov beıneledi. Basqa da ártister qoıylymnyń oıdaǵydaı shyǵýyna úlesin qosty.
Premeradan soń oblys ákiminiń orynbasary Baqytjan Narymbetov qazaq halqynyń tarıhynda kóne zamannan beri azattyq úshin qasyq qany qalǵansha kúresken Tomırısteı batyr ul-qyzdarynyń az bolmaǵandyǵyn, Táýelsizdiktiń 30 jyldyǵy qarsańynda atalǵan qoıylymnyń sátti shyqqanyn atap ótti.
«Táýelsizdiktiń 30 jyldyǵyna oraı «Tomırıs» arnaıy qoıyldy. Bul rette Shahımardan Qusaıynovtyń peasy tańdalyp alyndy. Qalıhan Ysqaq ta qazaqtyń nebir shuraıly sózderin taýyp, sátti aýdarǵan. Týyndy dramatýrgııanyń klassıkalyq úlgilerine tolyq saı keledi. Keıipkerlerdiń bir-birimen qaqtyǵysy, tartysy barynsha shynaıy berilgen. ıAǵnı ana men bala, ákeniń úsheýiniń arasyndaǵy taq talasyna qurylǵan. Shekspırdiń «Gamletinde» ana men bala, ákeniń arasyndaǵy tartys sııaqty, munda da sondaı shıelenis bar. Sonyń bári, túptep kelgende, el men jerdi saqtap qalýǵa tireledi. Oraldaǵy qazaq teatry osymen 29-maýsymyn ashyp otyrsa, bul – meniń osynda qoıǵan 27-inshi spektaklim», - dedi QazAqparat tilshisine qoıylym rejısseri Murat Ahmanov.
Eske sala keteıik, budan buryn Táýelsizdiktiń 30 jyldyǵyna oraı Oralda jas dombyrashylar baıqaýy márege jetkenin jazǵan bolatynbyz.