BQO kásipkerleri sý tasqynymen kúres kezinde kómek kórsetýde

<p>ORAL. KAZINFORM - Premer-Mınıstrdiń orynbasary Nurlan Baıbazarov pen Batys Qazaqstan oblysynyń ákimi Narıman Tóreǵalıev qurylys, óndiris jáne jol-qurylys kompanııalarynyń basshylarymen kezdesti.</p>

Bıznes ókilderi kásiporyndardaǵy qazirgi ahýal jáne keltirilgen shyǵyndar týraly aıtyp, sý tasqynyna qatysty ózderin tolǵandyratyn suraqtar qoıdy.

Vıtse-premer memleket bıznes-qoǵamdastyqqa qajetti qoldaý kórsetetinin atap ótip, jergilikti atqarýshy organdarmen baılanysta bolýdy surady.

«Kópshiligińizdiń óndiristik protsester ǵana emes, shıkizatpen qamtylý, logıstıka jáne ótkizý máselelerine áser etetin kúrdeli jaǵdaıǵa tap bolǵandaryńyzdy túsinip otyrmyz. Keltirilgen shyǵyndar týraly árbir málimdeme jeke qaralady. Bul birinshi kezekte shaǵyn jáne orta bızneske qatysty», — dedi Nurlan Baıbazarov.

Sonymen qatar ol Memleket basshysynyń tapsyrmasy boıynsha bankter men mıkroqarjy uıymdary ShOB sýbektileri men jeke kásipkerlerdiń nesıeleri boıynsha tólemderin keıinge qaldyratynyn, aıyppuldar men ósimpuldardyń óspeıtinin aıtty.

Óńir basshysy Narıman Tóreǵalıev jınalǵandarǵa túsinistik tanytqandary úshin alǵysyn bildirdi. Shamamen 50-ge jýyq kásiporyn sý tasqynymen kúres kezinde kómek kórsetip jatyr.

Bıznes ókilderi sý tasqynymen kúres, onyń ekinshi tolqyny jáne qalpyna keltirý jumystary kezinde kómek kórsetýdi jalǵastyrýǵa daıyn ekenderin aıtty. Qajet kezde qosymsha resýrstar, tehnıka berip, sondaı-aq arnaıy qorlarǵa qarajat aýdarady.