BQO-ǵa turaqty turýǵa 15-ten astam teolog shaqyrylady
Bul týraly oblys ákiminiń orynbasary Marat Toqjanovtyń tóraǵalyǵymen ótken BQO ákimdigi janyndaǵy dinı birlestiktermen baılanystar jónindegi keńestiń kezekti otyrysynda aıtyldy, dep habarlaıdy QazAqparat tilshisi.
BQO din isteri basqarmasynyń basshysy Talǵat Nyǵmetovtiń aıtýynsha, zertteýler men taldaý jumystary kórsetkenindeı, dinı ekstremızm men lańkestiktiń aldyn alýda dál osy aqparattyq-túsindirý jumystary negizgi pármendi ádis-tásil bolyp tabylady. Qazirgi tańda óńirde oblystyq, qalalyq jáne aýdandyq deńgeıde barlyǵy 14 aqparattyq-túsindirý toptary qyzmet etedi. Bıyl osy toptar arqyly 162640 adamdy qamtyǵan 1353 shara ótkizildi. Degenmen bul jumystardy áli de shırata túsýdiń mańyzy zor.
Osy oraıda aldaǵy jyldyń 20 qańtaryna deıin aýdandyq jáne qalalyq ákimdikterdiń apparattary quramyndaǵy qazirgi bar shtattar aıasynda dinı qyzmetti retteý salasynda jumys júrgizetin arnaıy qyzmetker bólý qarastyrylýda. Dinı salada jumystaný úshin áleýmettik tapsyrys esebinde Oralda (900 myń teńge), Bórli (2 mln. teńge), Aqjaıyq (500 myń teńge), Syrym (2 mln. teńge), Tasqala (1 mln. teńge) aýdandarynda qajetti qarjy bólinip, úkimettik emes uıymdar (ÚEU) jumyldyrylyp jatqanymen, basqalarynda bul másele sheshilmegen. Sol sekildi Bókeı ordasy men Zelenov aýdandarynyń mekemeleri teologtarmen, dintanýshylarmen qamtylmaǵan.
Jańa ádis-tásil degende, memlekettik áleýmettik tapsyrystar arqyly jastardyń patrıottyq sezimderin arttyryp, dástúrli rýhanı jáne ulttyq-mádenı qundylyqtardy nasıhattaıtyn 3D formattaǵy qysqa metrajdy beınerolıkter jasaqtap, kınoteatrlarda, oıyn-saýyq ortalyqtarynda jáne jastar kóp shoǵyrlanatyn basqa da jerlerde kórsetý usynylady. ÚEU arqyly úgit brıgadalary men poıyzdaryn, fleshmobtar uıymdastyrsa, artyq emes. Jumyssyz júrgen dinı jamaǵattyń aqparattyq bazasyn jasaqtap, olardy jumysqa ornalastyrý maqsatynda oblystyń barlyq meshitterinde juma namazy kezinde bos jumys oryndary týraly derekter berip otyrý qajet. Óńirge uzaq merzimdi turaqty jumysqa on besten astam teologty, sonyń ishinde orys tilin jetik biletin mamandardy tartyp, osynda túpkilikti qalýy úshin áleýmettik jaǵdaıyn jasasa, durys bolar edi.
Jıynda oblys ákiminiń orynbasary Marat Toqjanovtyń atap ótkenindeı, Aqtóbe jáne Almaty qalasynda oryn alǵan lańkestik oqıǵalardan keıin bul baǵyttaǵy jumystardyń kúsheıtilgeni belgili. Bıylǵy 6 maýsymnan bastap óńirde engizilgen lańkestik qaýiptiliktiń birqalypty sary deńgeıi 2017 jyldyń 17 qańtaryna deıin uzartyldy. Sondyqtan ekstremızm men lańkestikke qarsy turý úshin turǵyndar, ásirese, jastar arasynda dinı saýattylyq deńgeıin arttyrý máselesi kún tártibinen túspeıdi.
Otyrysta sondaı-aq oblystyq Mmádenıet, muraǵattar jáne qujattama, Jumyspen qamtýdy úılestirý jáne áleýmettik baǵdarlamalar, Jastar saıasaty máseleleri basqarmalarynyń basshylary Dáýletkereı Qusaıynov, Janat Asantaev, Aıan Sakoshev óz usynys-pikirlerimen bólisip, dinı salada kúsh biriktirip, qyzmet atqarýdyń máni zor ekendigin jetkizdi.